Cafodd yr actor Ioan Gruffudd ysbrydoliaeth gan ei ferch fach newydd ar gyfer ei waith diweddara.
Mae'r actor yn lleisio rhaglen newydd i blant bach, Igam Ogam, a fydd yn cychwyn ar S4C yr wythnos yma.
Ym mis Medi ganwyd Ella Betsi i'r actor a fagwyd yng Nghaerdydd a'i wraig Alice Evans, sydd hefyd yn actores.
Gwnaeth Ioan y gwaith lleisio drwy gysylltiad stiwdio ger ei gartref yn Los Angeles ac un yng Nghaerdydd.
Ond dywedodd yr actor ei fod wedi bod yn ymarfer drwy ddarllen y sgriptiau i Ella Betsi.
Mae Igam Ogam yn dilyn anturiaethau merch sy'n byw mewn ogof.
Mwynhau
Eglurodd yr actor 35 oed ei fod yn falch iawn o gael y cais gan gwmni Calon.
"Mae gan y cwmni record wych o gynhyrchu rhaglenni animeiddio ar gyfer plant ifanc," meddai Ioan.
"Dwi'n gobeithio y bydd Ella Betsi yn mwynhau'r gyfres unwaith y bydd yn hyn.
"Roedd hi'n edrych fel ei bod yn mwynhau'r sgriptiau pan oeddwn i'n eu darllen iddi."
Cafodd y gyfres ei gwneud gan gwmni Calon o Gaerdydd.
Nhw fel cwmni oedd yn gyfrifol am waith creadigol y cyfresi Holi Hana, Superted, Sali Mali a Sam Tan.
"Roeddwn yn falch iawn bod Ioan wedi gallu canfod amser i leisio'r gyfres," meddai cyfarwyddwr lleisiol Cymraeg cwmni Calon, Pat Griffiths.
"Mae ei lais yn wych, yn dwym a dwi'n si?r y bydd y plant ifanc fydd yn gwylio yn meddwl ei fod yn siarad yn uniongyrchol efo nhw."
Ruth Jones o'r gyfres Gavin a Stacey sy'n lleisio'r fersiwn Saesneg fydd i'w gweld yn y gwanwyn.
Mae'r gyfres yn gyd-gynhrychiad S4C, Five, y sianel Gaeleg MG Alba a Cyllid Cymru.
Fe wnaeth cwmni darlledu ABC o Awstralia brynu'r gyfres yn ddiweddar.
Fe fydd Igam Ogam ar S4C am 12.30pm o ddydd Llun i ddydd Gwener o Dachwedd 9-Rhagfryr 4.
CYSYLLTIADAU RHYNGRWYD:
Calon TV
Dyw'r BBC ddim yn gyfrifol am gynnwys safleoedd rhyngrwyd allanol