Mae gohebydd amaeth profiadol a newyddiadurwr llawrydd wedi marw yn 69 oed.
Bu Bob Davies, a oedd yn byw yn y Trallwng, Powys, yn gweithio i gylchgrawn y Farmers' Weekly am 44 mlynedd.
Ymhlith y materion y bu'n gohebu arnyn nhw oedd clwy'r traed a'r genau ac argyfwng BSE.
Dywedodd y Farmers' Weekly ar eu gwefan bod Mr Davies wedi marw ddydd Sul ar ôl cymhlethdodau yn dilyn ffliw.
Ymunodd â'r cylchgrawn yn 1965 gan weithio yn y pencadlys yn Llundain.
Flwyddyn yn ddiweddarach symudodd i Gymru i ohebu ar faterion amaeth yng Nghymru.
'Dealltwriaeth gydymdeimladol'
Dywedodd llywydd Undeb Amaethwyr Cymru Gareth Vaughan: "Ers i Bob ddechrau gohebu ar faterion yn effeithio ar ffermwyr Cymru dros 40 mlynedd yn ôl, bu'n gefnogwr ffyddlon a ffrind agos i Undeb Amaethwyr Cymru a'u swyddogion a'u staff.
"Rydw i wastad wedi bod â meddwl uchel iawn ohono oherwydd ei wybodaeth drylwyr a dealltwriaeth gydymdeimladol o'n diwydiant yma yng Nghymru.
"Roedd ei straeon o weithgareddau'r undeb, yn enwedig yn ystod ein blynyddoedd cynnar, bob amser yn feistrolgar a dibynadwy.
"Roedd Bob yn glod i'w broffesiwn."
CYSYLLTIADAU RHYNGRWYD:
Farmers' Weekly
Undeb Amaethwyr Cymru
Dyw'r BBC ddim yn gyfrifol am gynnwys safleoedd rhyngrwyd allanol