Bu'n rhaid i drigolion un o strydoedd amlyca Abertawe symud allan ar ôl i wal uchel syrthio i'r ffordd.
Fe wnaeth rhan o wal Constitution Hill, yn agos i ganol y ddinas, syrthio yn fuan ar ôl hanner nos.
Dywedodd un o'r trigolion lleol, Luke England, fod hi'n "wyrth" nad oedd neb yn pasio ar y pryd.
Disgrifiodd ddarnau o'r wal 10 medr (32 troedfedd) fel rhai cymaint â maint car Mini.
Dywedodd y gwasanaethau brys bod trigolion Ffordd Cromwell wedi cael eu symud fel mater o ddiogelwch.
"Mae 'na lanast llwyr yna," meddai Mr England.
Ychwanegodd bod 'na law trwm yn yr ardal ddydd Gwener a dydd Sadwrn.
Cafodd diffoddwyr tân eu galw i'r ardal tua 00.30am ddydd Sul.
Fe fuodd swyddogion ar y safle tan i beiriannydd nwy â pheiriannydd o'r cyngor gyrraedd y safle.
Chafodd neb anafiadau.
Mae Constitution Hill yn ardal Townhill o'r ddinas.
CYSYLLTIADAU RHYNGRWYD:
Cyngor Abertawe
Dyw'r BBC ddim yn gyfrifol am gynnwys safleoedd rhyngrwyd allanol