Cyfres y Lludw yng Nghymru

Mae'n ddiwrnod hanesyddol wrth i Gyfres y Lludw gael ei chynnal yng Nghymru am y tro cyntaf.

Ac mae disgwyl hyd at 100,000 yn ystod y prawf pum niwrnod yng Ngerddi Sophia, Caerdydd.

Dylai cefnogwyr ganiatáu digon o amser i gyrraedd oherwydd mwy o draffig, mwy o bobl yn defnyddio trafnidiaeth gyhoeddus a gwaith ar draffordd yr M4.

Mae disgwyl y bydd tua 40 miliwn o bobl yn gwylio'r gêm yn fyw ar y teledu a hyd at 100 miliwn yn gwylio'r uchafbwyntiau.

Gobaith Cyngor Sir Caerdydd yw marchnata'r ddinas yn fwy eang.

Mae 'na amcangyfrif bod y prawf yn golygu hyd at £15 miliwn i'r economi leol.

Dyma'r tro cyntaf i unrhyw gêm yn y gyfres gael ei chynnal y tu allan i Loegr ac Awstralia.

Mae'r seremoni agoriadol am 10.30.

Dywedodd Ysgrifennydd Cymru, Peter Hain, y byddai'r gyfres yn "hwb" i economi'r ardal.

CYNGOR I DEITHWYR

• BYSIAU:Naw gwasanaeth bws lleol ar gael, yn teithio ar hyd Heol y Gadeirlan ger y stadiwm ac arosfannau eraill yn Heol Ddwyreiniol y Bont-faen
• PARCIO:Dim ond pobl sy'n byw ger y stadiwm sy'n cael parcio yn y cyffiniau. Mae disgwyl y bydd meysydd parcio'r ddinas yn brysur. Gwasanaeth parcio a theithio ger siop Ikea yn Heol y Fferi, Bae Caerdydd. Mae 'na feysydd parcio bysiau penodol ger y stadiwm. I gael hawl i barcio mae angen ffonio'r stadiwm ar 02920 409380.
• CERDDED/ BEICIO: Mae modd cerdded i'r stadiwm sy o fewn 20 munud i ganol y dref - ar hyd Llwybr Taf neu Heol y Gadeirlan. Mae 30 o lefydd cadw beic ger y stadiwm
• TRÊN: 20 munud o gerdded o Orsaf Ganolog Caerdydd i'r stadiwm
• CYSYLLTIAD GYDA'R BAE: Mae Bws y Bae rhwng canol y ddinas a Bae Caerdydd ac mae'r tacsi dŵr bob awr ar Afon Taf rhwng canol y ddinas a Bae Caerdydd
• FFYRDD AR GAU: Fe fydd Clos Sophia ar gau rhwng 6am-10pm am bum niwrnod

Am fwy o wybodaeth cliciwch ar wefan Clwb Criced Morgannwg

"Rydyn ni wedi gweld nifer o brif ddigwyddiadau chwaraeon yn cael eu cynnal yng Nghaerdydd dros y 10 mlynedd diwethaf o Gwpan Rygbi'r Byd i gemau rownd derfynol Cwpan yr FA.

"Ond hwn yw'r tro cyntaf i gêm brawf criced gael ei chynnal yma."

Gan ei fod yn gefnogwr criced dywedodd ei fod yn edrych ymlaen at wwylio rhywfaint o'r chwarae.

"Gyda 16,000 o bobl bob dydd yn y stadiwm, mae disgwyl i'r rhan hon o Gymru elwa'n fawr ar y Lludw," meddai.

"Nid yn unig y bydd yn dangos i weddill y byd ba mor wych ydi Caerdydd ond fe fydd yn hwb ychwanegol i'r economi leol."

Mae 'na dagfeydd ar draffordd yr M4 am fod gwaith lledu'r ffordd rhwng Cyffordd 29 a 32 ac mae 'na gyfyngiadau cyflymder rhwng Cyffordd 24 a 27.

Ni ddylai ymwelwyr geisio parcio ger y stadiwm ond defnyddio trafnidiaeth gyhoeddus neu gyfleusterau parcio a theithio.

Dylai gyrwyr ddilyn arwyddion penodol yn lle defnyddio system lloeren.

"Rydym yn disgwyl tua 100,000 o ymwelwyr yn y ddinas dros y dyddiau nesaf," meddai'r Prif Arolygydd Steve Murray o Heddlu De Cymru.

"Fe fydd ffyrdd yn y ddinas yn brysur iawn yn ystod yr oriau brig.

"Dylai pobl ddefnyddio trafnidiaeth gyhoeddus a chaniatáu digon o amser i gyrraedd y ddinas."

CYSYLLTIADAU RHYNGRWYD:
Bwrdd Criced Cymru a Lloegr (Saesneg)
Clwb Criced Morgannwg (Saesneg)
Cyngor Caerdydd
Chwaraeon BBC Cymru: Criced
Dyw'r BBC ddim yn gyfrifol am gynnwys safleoedd rhyngrwyd allanol