Mae 'na ddau achos arall o'r frech goch wedi eu cadarnhau yng Nghymru.
Mae un yn sir Abertawe a'r llall yng Nghastell-nedd Port Talbot.
Ar hyn o bryd mae achosion yn 17 o'r 22 sir yng Nghymru.
Erbyn hyn cafwyd 339 o achosion, y mwyafrif ohonyn nhw'n blant.
O'r rhain mae 260 yn y gorllewin a'r canolbarth, 58 yn y gogledd a 21 yn y de-ddwyrain.
Mae un person arall, 41 i gyd, wedi cael triniaeth ysbyty.
Dywedodd Gwasanaeth Iechyd Cyhoeddus Cenedlaethol Cymru fod achosion ardal Llandudno "o dan reolaeth".
Clwy'r pennau
Mae'r gwasanaeth yn annog rhieni i drefnu pigiad MMR i'w plant.
Hefyd mae nifer achosion y clwy'r pennau'n codi.
Achosion y frech gochYn 2008 roedd 329 o achosion yng Nghymru ond dywedodd y Gwasanaeth Iechyd fod 543 o achosion wedi eu cadarnhau ers Ionawr 1 eleni.
"Erbyn hyn, mae achosion bron iawn ym mhob un o siroedd Cymru," meddai Dr Marion Lyons, Pennaeth Tîm Gwarchod Iechyd Cyhoedd y Gwasanaeth Iechyd Cyhoeddus.
"Bob dydd mae nifer yr achosion yn dal i godi ac rydyn ni'n dal i boeni am unrhyw un sydd heb gael dau ddogn o'r brechiad MMR.
"Mae'r brechiad yn saff, yn effeithiol a'r unig amddiffyniad yn erbyn y frech goch.
Difrifol
"Hefyd mae'n amddiffyniad yn erbyn clwy'r pennau sydd ar gynnydd yng Nghymru."
Dywedodd fod y ddau glefyd â sgileffeithiau difrifol.
"Mae modd i blant gael niwed ar yr ymennydd neu farw o'r frech goch ac mae cymhlethdodau clwy'r pennau yn gallu cynnwys llid yr ymennydd a cholli clyw.
"Y rhai sy fwya mewn perygl o ddal y frech goch yw plant ysgol sydd ddim wedi cael dau ddogn o'r MMR neu blant rhwng 1 a 3 oed na chafodd y brechiad cyntaf yn 13 mis oed.
"Rydyn ni'n amcangyfri bod 45,000 o blant ysgol mewn perygl o ddal y frech goch ar hyn o bryd."
Rhif cyswllt Galw Iechyd Cymru yw 0845 46 47.
CYSYLLTIADAU RHYNGRWYD:
Llywodraeth y Cynulliad
Gwasanaeth Iechyd Cyhoeddus Cenedlaethol Cymru
Dyw'r BBC ddim yn gyfrifol am gynnwys safleoedd rhyngrwyd allanol