Mae Heddlu Antigua wedi cyhuddo dyn a llanc o lofruddio cwpl o dde Cymru.
Bu'r ddau yn Llys Ynadon St Johns cyn cael eu cadw yn y ddalfa.
Cafodd Ben a Catherine Mullany o Bontardawe, y ddau'n 31 oed, eu saethu yn eu hystafell westy ar ddiwrnod olaf eu mis mêl ym mis Gorffennaf.
Keniel Martin, 20 oed, a llanc 17 oed a sydd wedi cael eu cyhuddo o lofruddio'r cwpl.
Dywedodd y Ditectif Uwcharolygydd Keith Niven: "Cafodd tystiolaeth ei chyflwyno i Gyfarwyddwr Erlyniadau Cyhoeddus neithiwr ac fe gafodd y penderfyniad ei wneud i gyhuddo dau, un yn 17 oed ac un yn 20 oed."
Mae'r ddau'n wynebu cyhuddiadau o ddwyn ac o dderbyn nwyddau oedd wedi cael eu dwyn.
Cafodd y ddau eu holi ar ôl cyrch yr heddlu yn eu cartref dros y penwythnos.
Dywedodd teuluoedd y ddau gafodd eu llofruddio fod y datblygiad diweddara'n newyddion da.
'Parchu'
"Does dim sylw arall ac rydyn ni'n gobeithio y bydd y cyfryngau'n parchu ein preifatrwydd ni."
Mae llefarydd Heddlu'r De wedi dweud: "Ynghynt heddi y cafodd y teuluoedd wybod am y datblygiad diweddara.
"Rydyn ni'n helpu'r ymchwiliad ac mae plismyn yn cefnogi'r teuluoedd."
Roedd Heddlu Antigua wedi holi pump o bobl mewn cysylltiad â marwolaeth y ddau. Cafodd dwy fenyw eu harestio yr wythnos diwethaf a menyw a dau ddyn dros y penwythnos.
Cafodd Mr a Mrs Mullany eu saethu ar Orffennaf 27 yng Ngwesty Cocos.
Mae'r heddlu yn credu bod lladrad wedi mynd o'i le.
Bu farw Mrs Mullany yn syth ar ôl cael ei saethu yn ei phen ond bu farw Mr Mullany wythnos yn ddiweddarach ar ôl cael ei symud i Ysbyty Treforys, Abertawe.
Cafodd y ddau eu claddu mewn seremoni breifat yr wythnos diwethaf yn yr eglwys lle priododd y ddau.