Mae'r dasg o daclo gordewdra plant wedi cael hwb o £6.3 miliwn
Y Gronfa Loteri Fawr sy wedi rhoi'r arian i brosiectau drwy Gymru sy'n ceisio mynd i'r afael â'r broblem.
Mae mwy o blant yng Nghymru dros eu pwysau nag erioed o'r blaen.
Bydd 14 o brosiectau yn elwa ar yr arian o dan raglen Teuluoedd Iach y gronfa.
Nod y prosiectau yw datblygu ffyrdd newydd o hyrwyddo bwyta a byw'n iach.
Tri phatrwm
Bydd y prosiectau yn defnyddio tri phatrwm i gyflwyno'r nod o fyw'n iach.
Nod Ffrindiau Iach yw hybu bwyta'n iach a gwneud ymarfer corff drwy ddefnyddio plant hŷn fel mentoriaid i blant iau.
Mae Tiwtoriaid Iach yn rhoi cyngor a chefnogaeth i blant a'u teuluoedd tra bydd Lleoedd Iach yn cynnal gweithgareddau cymunedol i hybu byw'n iach.
Dywedodd Graham Benfield, aelod pwyllgor y Gronfa Loteri Fawr yng Nghymru a chadeirydd pwyllgor rhaglen Teuluoedd Iach: "Mae gordewdra plant yn bryder mawr sy'n wynebu teuluoedd a'r llywodraeth yng Nghymru.
"Mae tystiolaeth ar hyn o bryd yn dangos bod prosiectau sy'n mynd i'r afael â'r materion hyn drwy gynnwys y teulu cyfan yn fwy llwyddiannus a dyna pam fod y Gronfa Loteri Fawr wedi datblygu'r rhaglen Teuluoedd Iach."
'Closio'
Un o'r prosiectau fydd yn derbyn arian gan y gronfa yw Clybiau Plant Cymru Sir Gaerfyrddin sy'n gweithio gyda chlybiau ar ôl ysgol.
Dywedodd rheolwraig prosiect Clybiau Plant Cymru, Karen Pereira, eu bod yn falch o dderbyn yr arian.
"Rydyn ni'n credu bod plant yn dysgu'n well oddi wrth blant hŷn ac felly fe fydd plant 10-11 oed yn ein clybiau ni'n 'closio' at blant rhwng saith ac wyth oed," meddai.
"Dros gyfnod o dair blynedd, hynny yw hyd y prosiect hwn, rydyn ni'n gobeithio newid yn fawr agweddau plant at fwyd ac ymarfer corff," ychwanegodd.