Fe fydd mwy o oedi cyn y bydd papur dyddiol Y Byd yn cael ei gyhoeddi.
Y bwriad oedd cyhoeddi'r rhifyn cyntaf ar Fawrth 3.
Ond fe fyddai rhaid aros tan y bydd yr adolygiad o'r wasg Gymraeg wedi dod i ben, meddai cwmni Dyddiol Cyf.
Byddai rhaid i'r cwmni asesu pa fath o gefnogaeth araiannol fyddai'r fenter yn ei chael oddi wrth Lywodraeth y Cynulliad.
Ar raglen radio'r BBC Taro'r Post gwadodd Ned Thomas, cadeirydd y cwmni, fod yr oedi yn ergyd i obeithion y cynllun.
Dywedodd fod rhaid gohirio gan fod Llywodraeth y Cynulliad yn cynnal arolwg o'r wasg Gymraeg.
Mae disgwyl i'r arolwg ddod i ben erbyn diwedd y flwyddyn.
"Wrth i'r broses o adolygu'r wasg Gymraeg barhau, mae Dyddiol Cyf. yn aros yn eiddgar i glywed pa gefnogaeth fydd ar gael maes o law i helpu ariannu'r papur dyddiol.
"Fe hoffwn i ddiolch i holl gefnogwyr y fenter am eu cefnogaeth a'u hamynedd ac rwy'n hyderus y cawn ragor o newyddion positif am ddyfodol y wasg Gymraeg yn gynnar yn 2008."
Yn yr haf dywedodd y cwmni eu bod yn anelu at 5,000 o danysgrifwyr.
Dywedodd Mr Thomas ar Taro'r Post mai 700 oedd wedi tanysgrifio hyd yma.
Roedd yn "ffyddiog," meddai, y byddai'r papur yn cael ei gyhoeddi cyn diwedd 2008.
Cafodd y cynllun ei grybwyll gynta wyth mlynedd yn ôl.
Y nod yw argraffu'r papur bum niwrnod yr wythnos, o ddydd Llun i ddydd Gwener.
Bydd pencadlys y cwmni ym Machynlleth a staff llawn amser o 24.