Bydd y rhai sydd tu ôl i'r fenter i sefydlu papur dyddiol Cymraeg yn symud i'w swyddfa newydd ym Machynlleth erbyn canol haf.
Nod rheolwyr Y Byd yw cyhoeddi rhifyn cyntaf y papur cyn diwedd y flwyddyn.
Nos Iau daeth tua 50 o bobl Dyffryn Dyfi i gwrdd ag uwchswyddogion y papur er mwyn clywed eu cynlluniau.
Roedd y cyfarfod ym Machynlleth a bydd y papur yn agor prif swyddfa ym Mharc Ecolegol y dref a chreu 24 o swyddi.
Dywedodd Rebecca Williams, swyddog datblygu Y Byd: "Menter genedlaethol yw Y Byd, felly mae'n gwneud synnwyr i sefydlu'r pencadlys yn y canolbarth.
"Mae'n adeilad addas iawn ac mae hefyd yn beth da i greu swyddi mewn ardal lle mae eu gwir angen".
Yn ôl Ned Thomas, cadeirydd y cyhoeddwyr, roedd yn bwysig fod y papur yn magu perthynas â'r gymuned leol.
Penodi
Ym mis Tachwedd fe gyhoeddwyd fod dau wedi eu penodi'n olygydd a dirprwy olygydd, Aled Price a Catrin Rogers.
Mae Mr Price, o Gaerdydd yn wreiddiol, yn newyddiadurwr profiadol sydd wedi gweithio am flynyddoedd i BBC Cymru.
Y dirprwy olygydd fydd Catrin Rogers, golygydd papur lleol yn Hounslow yn Llundain.
Bu cais Y Byd am gymhorthdal rhanbarthol yn llwyddiannus.