Bydd 44 o weithwyr ffatri gaws yn Felinfach ger Llambed yn colli eu gwaith am fod y ffatri yn Nyffryn Aeron yn cau.
Mae'r cwmni sy'n berchen y safle wedi dweud y bydd 30 diwrnod o ymgynghori.
Clywodd staff ffatri gaws Aeron Valley eu bod yn colli gwaith ddydd Llun.
Dywedodd y perchnogion Lactalis McLelland mai'r rheswm oedd colledion cynyddol ond y gallai rhai o'r staff gael cynnig gwaith yn yr Alban.
Yn ôl Matt Glover, un o gyfarwyddwyr Lactalis McLelland, roedd y cwmni wedi edrych ar bob opsiwn cyn penderfynu cau.
"Mae hyn yn arbennig o drist oherwydd roedd tîm gwych yn yr hufenfa, sydd wedi gwneud eu gorau glas ers i ni brynu Aeron Valley ychydig dros ddwy flynedd yn ôl.
Camau cyfreithiol
"Serch hynny, er gwaethaf buddsoddiad yn y ffatri ac ymdrechion arbennig y staff, mae'r colledion wedi parhau i gynyddu."
Dywedodd AC Ceredigion Elin Jones y byddai'r cau yn "effeithio'n andwyol" ar gymuned Felinfach ac y byddai'n codi'r pwnc ar lawr y Senedd ddydd Mawrth.
Collodd 115 eu gwaith pan gaeodd ffatri brosesu caws Dairygold yn Felinfach ym mis Ebrill 2006.
Yr wythnos ddiwethaf cafodd cwmni Dairygold rybudd y gallai Llywodraeth y Cynulliad gymryd camau cyfreithiol er mwyn cael arian cyhoeddus yn ôl oddi wrth y cwmni.
Cafodd y cwmni o Iwerddon £663,528 yn 2002 er mwyn ehangu'r gwaith prosesu.