Mae cyfranddalwyr a chredydwyr Clwb Pêl-droed Wrecsam wedi cefnogi'n unfrydol ymdrech gan gonsortiwm, sy'n cael ei arwain gan Neville Dickens, i brynu'r clwb.
Mae'r credydwyr wedi cytuno i gytundeb £3.25m a fyddai'n golygu eu bod yn derbyn tua 28c ym mhob punt sy'n ddyledus iddyn nhw.
Mewn cyfarfod arall pleidleisiodd y cyfranddalwyr - oedd yn cynnwys cyn berchennog y clwb Alex Hamilton - o blaid trosglwyddo'r clwb.
"Dwi'n credu ei bod yn ddiwrnod da iawn i'r clwb. Dwi'n hyderus iawn," meddai rheolwr Wrecsam, Denis Smith.
Gofynnwyd i'r credydwyr a'r cyfranddalwyr i bleidleisio mewn dau gyfarfod gwahanol ar y Cae Ras ddydd Mawrth.
Pleidleisiodd Mr Hamilton, sy'n berchen ar 78% o'r cyfranddaliadau, trwy ddirprwy dros ganiatáu i Mr Dickens, gwerthwr ceir yn Wrecsam, a'i gonsortiwm i brynu'r clwb.
Mae arian yn ddyledus i Mr Hamilton gan y clwb hefyd.
'Goresgyn rhwystrau'
Mae gan y clwb ddyled o dros £5.4m ond cyn belled â bod pêl-droed yn parhau ar y Cae Ras mae cronfa'r loteri Sportlot a'r Sefydliad Pêl-droed yn anhebygol o hawlio ad-daliadau o £1m yr un.
Fe aeth Clwb Pêl-droed Wrecsam i ddwylo'r gweinyddwyr ddiwedd 2004 gyda dyledion o dros £4m.
Dywedodd Steve Williams, o'r gweinyddwyr Begbies Traynor: "Dwi'n credu ein bod wedi goresgyn pob rhwystr posib.
"O ran y canlyniad allwn ni ddim gwneud yn well na hyn."
Mae gan y clwb hyd at Fehefin 3 i sicrhau cytundeb neu fe allai gael ei ddiarddel o'r Gynghrair Bêl-droed am ei fod wedi bod yn nwylo'r gweinyddwyr am dros 18 mis.
Ond dywedodd Mr Williams ei fod yn obeithiol y byddai'r gynghrair yn ymestyn y dyddiad terfynol gan y cytunwyd ar gytundeb.
"Mae angen caniatâd y Gynghrair Bêl-droed arnon ni o hyd i ymestyn y cyfnod 18 mis," meddai.
"Rydyn ni'n hynod o hyderus y bydd y gwerthu'n digwydd."
Cosb
Unwaith y bydd y cytundeb wedi ei gwblhau Mr Dickens, ei bartner busnes Geoff Moss a'u consortiwm fydd yn berchen ar y clwb.
Cafodd y clwb gosb o 10 pwynt gan y Gynghrair Bêl-droed oherwydd ei sefyllfa ariannol ac o ganlyniad fe syrthiodd y tîm o Adran 1 i Adran 2 ym Mai 2005.
Wedi sawl gwrandawiad llys, dyfarnodd y Llys Apêl yn Llundain yn gynharach eleni mai'r gweinyddwyr ac nid Mr Hamilton ddylai fod yn berchen ar y Cae Ras.
Arweinydd y consortiwm sydd eisiau prynu'r clwb yw'r miliwnydd a'r masnachwr ceir Neville Dickens ac mae'n hyderus y gall gwblhau'r gwerthiant ac mae wedi addo ail-fuddsoddi'r holl elw yn y dyfodol yn y clwb.
Roedd Mr Dickens yn gyfarwyddwr y clwb yn yr 1980au ac mae'n berchen ar garej sydd ar dir drws nesaf i'r Cae Ras.
Fe geisiodd brynu'r clwb yn Ebrill 2005, cam a groesawyd ar y pryd gan Ymddiriedolaeth Cefnogwyr Wrecsam.
Mae Mr Dickens a'i bartner busnes Geoff Moss eisoes wedi cyflwyno cais cynllunio i ddatblygu stadiwm y clwb.
Mae'r cynlluniau yn cynnwys eisteddle newydd, fflatiau preifat a llety myfyrwyr.