Mae Plaid Cymru yn dechrau ar y broses o ail-frandio gan gyflwyno logo newydd bydd modd ei glywed yn unig.
Fe fydd y logo sonig newydd, sydd wedi cael ei greu gan y cyfansoddwr John Rea, yn cael ei ddefnyddio i groesawu ymwelwyr i wefan y blaid.
Yn ôl y blaid nhw yw'r blaid gyntaf ym Mhrydain i ddefnyddio'r math yma o logo sy'n cael ei lansio ddydd Gwener yn eu cynhadledd wanwyn yng Nghaerfyrddin.
Mae'r blaid hefyd yn gobeithio y gall y logo gael ei ddefnyddio'n fuan fel tôn ar y ffôn symudol.
Dywedodd yr AC Helen Mary Jones, Cyfarwyddwr Cyfathrebu'r blaid, mai pwrpas y logo newydd yw gwella'r ffordd y mae'r blaid yn cyfathrebu gydag etholwyr a bod ar flaen y gad yng ngwleidyddiaeth Cymru.
"Mae Plaid Cymru wedi bod ar flaen y gad o ran cyfathrebu," meddai.
"Y Triban (y logo gweledol) oedd y darlun gweledol i unrhyw blaid wleidyddol.
"Fe fydd y logo sonig yn croesawu defnyddwyr i'r wefan ac fe fyddwn yn edrych ar y posibilrwydd o'i ddefnyddio fel tôn ar gyfer y ffôn.
"Mae'r logo yn rhan allweddol o'r broses o ail-frandio," ychwanegodd.
Y cerddor a'r cyfansoddwr o Gaerdydd, John Rea, sy'n gyfrifol am gyfansoddi'r logo newydd.
Mae Mr Rea wedi cyfansoddi cerddoriaeth ar gyfer nifer o ffilmiau a rhaglenni teledu ac wedi derbyn comisiwn arbennig i gyfansoddi ar gyfer Cerddorfa Genedlaethol BBC Cymru.