British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Sadwrn, 24 Medi 2011, 09:13 GMT 10:13 UK
Golygydd newydd i Golwg360.com

Gwefan Golwg360

Mae gwefan Golwg360 wedi penodi golygydd newydd i fod yn bennaf gyfrifol am gynnwys y gwasanaeth.

Mae Bethan Lloyd yn cymryd lle Ifan Morgan Jones sydd wedi bod yn y swydd ers i'r gwasanaeth gael ei lansio ym Mai 2009.

Roedd Bethan Lloyd yn Is-olygydd a Golygydd yr Iaith Gymraeg gyda'r Western Mail am ddeuddeg mlynedd.

Cyn hynny bu'n ohebydd i BBC Radio Cymru ac i'r Caernarfon & Denbigh Herald, Yr Herald Gymraeg a'r Rhyl & Abergele Visitor.

'Cyfrwng cyffrous'

Dywedodd Bethan Lloyd: "Rwy'n edrych ymlaen yn fawr at fod yn rhan o dîm Golwg360 sy'n arwain gyda straeon sydd o ddiddordeb i bobl yng Nghymru.

"Mae'r we'n gyfrwng cyffrous iawn ac mae Golwg360 eisoes yn cynnig gwasanaeth cynhwysfawr sy'n cymharu'n ffafriol â gwefannau newyddion mewn ieithoedd eraill.

"Mae gen innau syniadau newydd ac rwy'n edrych ymlaen at yr her o ddatblygu Golwg360 ymhellach."

'Profiadol'

Yn ôl Prif Weithredwr Golwg360, Owain Schiavone: "Rydan ni'n falch iawn o allu penodi rhywun mor brofiadol â Bethan i'r swydd allweddol yma.

"Ers lansio'r gwasanaeth ddwy flynedd yn ôl mae Ifan Morgan Jones wedi gosod Golwg360 ar sail gadarn, gan ddarparu newyddion Cymraeg di-baid ar y We.

"Rydym nawr yn edrych ymlaen at y bennod nesaf yn hanes datblygiad y gwasanaeth dan arweiniad Bethan, ac yn gwybod y bydd ganddi lawer o syniadau i'w rhoi ar waith."

Cytundeb

Ym mis Mawrth eleni, cyhoeddwyd y bydd y cytundeb rhwng Cyngor Llyfrau Cymru a gwefan Golwg360 yn parhau am dair blynedd arall.

Bryd hynny, dywedodd Cyfarwyddwr y Cyngor Llyfrau, Elwyn Jones, fod y gwasanaeth wedi sefydlu ei hun fel ffynhonnell newyddion rhyngwladol ac o Gymru.

Ym mis Mawrth 2010 roedd y Cyngor Llyfrau wedi comisiynu cwmni Wavehill o Aberaeron i gynnal arolwg o'r gwasanaeth, gan gasglu barn defnyddwyr am y gwasanaeth a phatrymau ymweld â'r wefan.

Roedd canmoliaeth gyffredinol i safon newyddiaduraeth y gwasanaeth.

Roedd yr adroddiad hefyd yn cynnwys argymhellion ar ffyrdd o ddatblygu'r gwasanaeth.



HEFYD
Estyn cytundeb Golwg360
28 Maw 11 |  Newyddion
Golwg 360: Pennaeth yn gadael
10 Medi 09 |  Newyddion
Enwi pennaeth gwefan Golwg
05 Medi 08 |  Newyddion
Lansio gwefan newydd Golwg360
15 Mai 09 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific