Gweinidog: 'Newidiadau anodd i'r GIG'

Mae'r Byrddau Iechyd wrthi'n paratoi cynlluniau am newid a moderneiddio'r GIG

Mae'r Gweinidog Iechyd wedi rhybuddio y bydd newidiadau anodd i'r Gwasanaeth Iechyd yng Nghymru.

Bydd Lesley Griffiths AC yn siarad mewn cynhadledd ddydd Mercher gan ddweud y bydd newid mawr yn digwydd dros y pum mlynedd nesaf.

Fe fydd hi'n addo "derbyn beirniadaeth" am y newidiadau gan ddweud na fyddan nhw'n hawdd i staff nac i gleifion.

Mae'r gwrthbleidiau wedi cyhuddo'r gweinidog o osgoi cyfrifoldeb drwy sefydlu grŵp annibynnol i ystyried argymhellion gan fyrddau iechyd am newid.

Bydd Ms Griffiths yn ateb y beirniaid mewn araith i gynhadledd Iechyd Cyhoeddus Cymru lle bydd yn dweud fod newid yn anorfod.

'Penderfyniadau anodd'

Dydd Llun fe amlinellodd y cynlluniau i wella gofal mamolaeth yng Nghymru, gan rybuddio byrddau iechyd na ellid caniatáu i wasanaethau lacio drwy beidio moderneiddio.

Bydd yn dweud ddydd Mercher: "Ni fydd gwneud y newidiadau yma'n hawdd.

"Ni fyddan nhw'n hawdd i staff ymroddgar sy'n gweithio yn y GIG. Mewn rhai achosion, ni fydd y newidiadau'n hawdd i gleifion eu derbyn chwaith.

"Ar lefel bersonol, rwy'n gwybod na fydd y newidiadau yn hawdd yn wleidyddol chwaith - fe fydd y byrddau iechyd yn gwneud penderfyniadau anodd y bydd rhaid i mi eu hystyried yn y pen draw.

"Ond rhaid i mi bwysleisio beth bynnag yw'r feirniadaeth sydd o 'mlaen i wrth gyflawni'r polisïau sydd gennym i wella'r GIG, neu i wneud y penderfyniadau cywir i Gymru ar sut y bydd gwasanaethau'n cael eu cyflawni yn y dyfodol, mae un peth yn sicr.

"Ni fyddaf yn gochel rhag y gwaith sydd o'n blaenau oherwydd rwy'n gwybod fod rhaid newid, a bod y hi'n hen bryd i'r newid ddigwydd mewn rhai achosion."

Dadl danllyd

Bu dadl danllyd yn y senedd ddydd Mawrth rhwng y Prif Weinidog, Carwyn Jones, ac arweinydd y Ceidwadwyr Andrew RT Davies.

Roedd Mr Davies yn dweud fod ymgynghorwyr i Lywodraeth Cymru wedi creu cynlluniau i gael gwared a 1,200 o nyrsys, peidio recriwtio mwy o staff ac i gau rhai o adnoddau'r GIG.

Gwadodd y Prif Weinidog fod y gwaith gan gwmni McKinsey wedi ei wneud ar ran y llywodraeth gan bwysleisio nad oedd y toriadau wedi digwydd.

Deellir y bydd y Byrddau Iechyd yn cyflwyno eu cynlluniau i newid a moderneiddio i Ms Griffiths o fewn yr wythnosau nesaf.

Eisoes mae hi wedi cyhoeddi panel annibynnol - y Fforwm Clinigol Cenedlaethol - i archwilio'r cynigion ar ei ran.

Dywedodd llefarydd y Ceidwadwyr ar iechyd, Darren Millar AC: "Mae sefydlu'r grŵp yma yn ymgais gan y gweinidog i osgoi cyfrifoldeb am y GIG yng Nghymru.

"Mae'n symudiad llwfr sy'n ceisio pasio cyfrifoldeb am benderfyniadau amhoblogaidd sy'n ganlyniad uniongyrchol o bolisi Llywodraeth Lafur Cymru."