British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 16 Medi 2011, 12:41 GMT 13:41 UK
Glowyr: Darganfodpedwerydd corff

Timau achub ym Mhwll Gleision

Mae timau achub sy'n ceisio canfod pedwar dyn gafodd eu dal yn sownd mewn pwll glo ger Pontardawe wedi dod o hyd i bedwerydd corff.

Mae'r timau achub hefyd wedi cadarnhau eu bod wedi llwyddo i gyrraedd y corff cyntaf i gael ei ganfod ym mhwll y Gleision ger Cilybebyll yn gynnar fore Gwener.

Nid ydynt wedi llwyddo i gyrraedd yr ail gorff a gafodd ei ganfod tua 12.15pm ddydd Gwener.

Cafodd y trydydd corff ei ganfod tua 3pm ddydd Gwener.

Dyw'r cyrff heb gael eu hadnabod hyd yma.

'Gwahanu'

Timau achub ym Mhwll Gleision
Bu'r timau achub yn gweithio drwy'r nos i geisio cyrraedd y pedwar

Dywedodd Chris Margetts o Wasanaeth Tân ac Achub De Cymru fod y corff cyntaf wedi ei ganfod ar waelod y brif siafft o'r pwll, a'r ail gorff yn agos i'r lle yr oedd yn gweithio.

Dywedodd Mr Margetts fod y gwasanaethau achub wedi llwyddo i ostwng lefel y dŵr yn y pwll ac bod hynny'n hwyluso'r gwaith o chwilio.

Dywedodd yr Uwch-arolygydd Phil Davies: "Mae teuluoedd y dynion wedi cael clywed am y marwolaethau ac yn amlwg rydym yn cydymdeimlo gyda nhw yn y cyfnod hynod anodd yma."

Bu'n rhaid i ddeifwyr oedd yn chwilio am y dynion rhoi'r gorau i'w hymgais dros nos.

Y gobaith oedd y byddai'r glowyr - sydd wedi eu dal 90 metr o dan ddaear - wedi medru dod o hyd i boced o aer wedi i'r pwll lenwi gyda dŵr pan chwalodd un o furiau mewnol y gwaith.

Y pedwar gafodd eu dal yn sownd yw Phillip Hill, 45, o Gastell-nedd, Charles Breslin (62), David Powell (50) a Garry Jenkins (39) i gyd o Gwm Tawe.

Roedd pumed glöwr yn ddifrifol wael yn yr ysbyty wedi iddo ddianc o'r pwll wrth i'r dŵr lifo i mewn bore Iau.

Llwyddodd dau ddyn arall i ddianc yn holliach, ac roedden nhw'n cynorthwyo'r timau achub gydol y dydd.



HEFYD
Glowyr: Carwyn Jones yn ymweld
16 Medi 11 |  Newyddion
Glowyr: Deifwyr yn gorfod troi'n ôl
16 Medi 11 |  Newyddion
Pedwar yn sownd dan ddaear
15 Medi 11 |  Newyddion


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific