Cymru yn cyrraedd Seland Newydd

Llun swyddogol o'r garfan cyn iddyn nhw gychwyn am Seland Newydd

Mae carfan rygbi Cymru ar gyfer Cwpan Rygbi'r Byd wedi cyrraedd Seland Newydd.

Gadawodd y garfan a'r tîm rheoli Westy'r Vale ddydd Mercher.

Fe fydd eu gêm gyntaf yn y bencampwriaeth yn erbyn De Affrica ar Fedi 11.

GEMAU CYMRU Medi 11 - De Affrica Medi 18 - Samoa Medi 26 - Namibia Hydref 2 - Fiji

Cyn gadael dywedodd hyfforddwr Cymru, Warren Gatland, ei fod yn hapus iawn efo'r hyn sydd wedi cael ei wneud ymlaen llaw.

Dywedodd y gŵr o Seland Newydd ei fod yn hapus iawn gyda'r gemau paratoi ym mis Awst.

"Mae'n rhaid i ni edrych ymlaen at fynd i Seland Newydd, mae'n rhaid i ni fynd yno gyda lot o hyder.

"Dwi'n gwybod bod yr hogiau yn barod ac yn mynd i roi o'u gorau.

"Dyma binacl gyrfa unrhyw chwaraewr rygbi rhyngwladol, fel chwaraewr neu hyfforddwr, i fod yn rhan o Gwpan y Byd."

'Camgymeriadau'

Fe wnaeth Gatland hefyd ddweud ei fod wedi siarad gyda Gareth Jenkins, cyn-hyfforddwr Cymru, cyn gadael.

Jenkins oedd hyfforddwr Cymru ym mhencampwriaeth Cwpan y Byd diwethaf yn Ffrainc.

Mae Warren Gatland yn edrych ymlaen i ddychwelyd i Seland Newydd efo Cymru

Collodd ei swydd wedi perfformiad siomedig Cymru.

"Roedd yn grêt siarad gyda Gareth am ei brofiadau bedair blynedd yn ôl.

"Fe wnes i siarad gyda fe a'i gynorthwyydd ar y pryd, Nigel Davies, am yr hyn wnaethon nhw bedair blynedd yn ôl a be fydden nhw wedi ei newid.

"Yn amlwg fe wnaethon nhw gamgymeriadau ac fe fydden nhw'n gwneud newidiadau yn ddi-os.

"Rydym i gyd yn dysgu o'n camgymeriadau."

Dywedodd hefyd ei bod yn fraint mynd â thîm Cymru i Seland Newydd.

"Dwi'n gobeithio y gallwn wneud Cymru yn falch iawn ohonon ni," ychwanegodd.