British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 26 Awst 2011, 15:55 GMT 16:55 UK
'Methu chyhoeddi llyfrau Cymraeg' ar y Kindle

Kindle
Mae dwy nofel Gymraeg eisoes ar y Kindle

Mae cwmni cyhoeddi wedi datgan eu rhwystredigaeth am nad yw cwmni Amazon yn "gallu cyhoeddi llyfrau Cymraeg" ar y Kindle.

Dywedodd Gwasg Y Lolfa eu bod nhw wedi gofyn i Amazon werthu eu llyfrau ar ffurf electroneg ar y peiriant ers Nadolig 2010.

Mae neges e-bost Amazon at gwmni'r Lolfa, y mae BBC Cymru wedi ei gweld, wedi dweud nad yw eu systemau "yn gallu cynnal cyhoeddi llyfrau yn y Gymraeg" ar hyn o bryd.

Dywedodd y wasg nad oedd hynny'n hollol wir am fod dwy nofel Gymraeg a gyhoeddwyd ganddyn nhw eisoes ar werth ar y peiriant.

Mae BBC Cymru wedi gofyn am ymateb Amazon.

Mae Amazon wedi dweud y byddai rhaid iddyn nhw gyflogi siaradwyr Cymraeg i brawfddarllen y llyfrau cyn iddyn nhw gael eu gosod ar y safle
Garmon Gruffydd, Y Lolfa

Mae'r cwmni cyhoeddi o Dalybont yng Ngheredigion wedi dweud bod y galw am lyfrau Cymraeg ar werth ar y Kindle yn cynyddu.

Yn ôl rheolwr cyffredinol y cwmni, Garmon Gruffydd, fe fu llawer o bobl yn ymweld â'u stondin ar Faes yr Eisteddfod Genedlaethol eleni yn gofyn pam nad oedd llyfrau Cymraeg ar gael ar y Kindle.

'Gwrthod'

"Cysyllton ni ag Amazon y llynedd gan ofyn iddyn nhw werthu ein llyfrau Cymraeg ar y Kindle," meddai.

"Gwrthodon nhw ein cais, gan ddweud nad oedd eu systemau yn gallu cynnal cyhoeddi llyfrau yn y Gymraeg.

"Ond mae nofelau Lleucu Roberts a Lloyd Jones ar werth ar y Kindle ers dechrau'r flwyddyn ac mae nofel Lleucu Roberts wedi gwerthu 10 copi ar system Kindle y mis hwn yn unig.

"Yn amlwg, mae pobl Amazon wedi meddwl bod y nofelau yn ddau o'r llyfrau Saesneg wnaethon ni anfon atyn nhw ac wedi eu gosod ar y Kindle ar hap.

"Ond mae hyn yn profi bod systemau Amazon yn gallu cynnal cyhoeddi llyfrau Cymraeg."

'Adolygu'

Roedd Amazon wedi dweud wrth y wasg eu bod yn "adolygu'r sefyllfa er mwyn gallu ehangu darpariaeth y llyfrau mewn sawl iaith a chynyddu nifer y cyhoeddiadau sydd ar gael".

Dywedodd Mr Gruffydd fod Amazon wedi dweud wrthwyn nhw y byddai'n rhaid iddyn nhw gyflogi siaradwyr Cymraeg i brawfddarllen y llyfrau cyn iddyn nhw gael eu gosod ar y safle.

"Rwy'n mawr obeithio mai dyma fydd y cam nesaf oherwydd mae'n bwysig fod y Gymraeg yn cael yr un statws ag ieithoedd eraill."

Mae teclyn y Kindle wedi ei ddatblygu gan gwmni Amazon fel y gall pobl ddarllen llyfrau ar ffurf electroneg.



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific