Dyfodol llyfrgelloedd yn y fantol

Y gwasanaeth ddim yn perfformio'n dda, yn ôl y cyngor

Mae cannoedd o bobl wedi ymateb i ymgynghoriad ynglŷn â chynlluniau i gau hyd at saith llyfrgell yn Sir Conwy.

Mae'r ymgynghoriad ynglŷn â dyfodol 12 llyfrgell y sir yn dod i ben ddydd Gwener ac mae bron i 300 o ffurflenni adborth wedi'u hanfon at y cyngor.

Mae'r cyngor sir yn ystyried dau opsiwn - i gau un ai pump neu saith o'r 12 llyfrgell sydd yn y sir.

Byddai gweithredu'r opsiwn cyntaf yn golygu bod llyfrgelloedd Bae Cinmel, Cerrigydrudion, Deganwy, Cyffordd Llandudno, Llanfairfechan, Penmaenmawr a Bae Penrhyn yn cau.

Cyflwr gwael

Y pum llyfrgell a fyddai'n cau pe bai'r ail opsiwn yn cael ei ddewis fydd Deganwy, Cyffordd Llandudno, Bae Cinmel, Llanfairfechan a Bae Penrhyn.

Honnwyd yn un o gyfarfodydd y cyngor y llynedd bod y gwasanaeth yng Nghonwy yw un o'r rhai sy'n perfformio gwaethaf yng Nghymru.

LLYFRGELLOEDD SIR CONWY Abergele Bae Cinmel Bae Colwyn Bae Penrhyn Cerrigydrudion Conwy Cyffordd Llandudno Deganwy Llandudno Llanfairfechan Llanrwst Penmaenmawr

Dywedodd y cyngor nad oedd digon o amrywiaeth o lyfrau, dim digon o staff a bod adeiladau mewn cyflwr gwael.

Penderfynodd y cyngor lansio ymgynghoriad gan adael i ddefnyddwyr gael cyfle i leisio barn.

Dywedodd aelod cabinet Cyngor Sir Conwy sy'n gyfrifol am gymunedau, Goronwy Edwards: "Rwy'n annog pobl i ymateb gan lenwi ffurflen adborth i sicrhau bod cymaint o syniadau â phosib yn cael eu cynnig."

Hyd yn hyn mae'r cyngor sir wedi derbyn 291 ffurflen adborth gan y cyhoedd.