Rees ddim ar gael am 10 wythnos wedi llawdriniaeth

Cafodd capten tîm rygbi Cymru a'r Scarlets lawdriniaeth lwyddiannus ar ei wddw.

Mae disgwyl na fydd Matthew Rees yn holliach i chwarae am 10 wythnos yn ôl hyfforddwr y rhanbarth Nigel Davies.

Oherwydd yr anaf doedd Rees ddim yn gallu cael ei ystyried ar gyfer y daith i Seland Newydd i gystadlu ym Mhencampwriaeth Cwpan Rygbi'r Byd.

Cafodd frechiadau lladd poen i geisio parhau yn y garfan a fydd yn gadael ar Awst 31.

Ond roedd rhaid iddo dynnu allan.

"Fe aeth y driniaeth yn dda iawn," yn ôl Davies.

'Dewisiadau'

"Mae Matthew yn dda iawn ac rydym yn gobeithio y bydd yn ôl yn chwarae o fewn wyth i 10 wythnos."

Mae Rees yn gobeithio dychwelyd ar gyfer gêm y Scarlets yn erbyn Y Gweilch ar Dachwedd 5 cyn iddyn nhw gychwyn ar eu hymgyrch yng Nghwpan Heineken yn erbyn Castres.

Oherwydd yr anaf i Rees mae bachwr arall y Scarlets Ken Owens wedi ei gynnwys yng ngharafán Cymru.

Ond dywedodd Davies fod ganddo "sawl opsiwn" ar gyfer y safle gydag Emyr Phillips, Craig Hawkins a Kirby Myhill yn barod ar gyfer y tîm cyntaf.