Cytundeb tair blynedd i Monk

Cafodd yr amddiffynnwr Garry Monk gapteiniaeth Abertawe yn 2006

Mae capten Abertawe, Garry Monk, wedi arwyddo cytundeb newydd tair blynedd gyda'r clwb Uwchgynghrair.

Mae'r amddiffynnwr 32 oed wedi chwarae dros 200 o weithiau ers ymuno â'r Elyrch yn 2004 ar ôl cael ei ryddhau gan Barnsley.

Fe arwyddodd Monk gytundeb newydd yn 2009 o dan y cyn-reolwr Paulo Sousa, fyddai wedi dod i ben ddiwedd y tymor hwn.

Ond mae cyn-chwaraewr Southampton a Torquay nawr wedi ymrwymo i aros yn Abertawe tan ddiwedd tymor 2013/14.

Mae Monk wedi arwyddo cytundeb newydd ddyddiau cyn i'r Elyrch chwarae eu gêm gynta' yn yr Uwchgynghrair, yn erbyn Manchester City ar Awst 15.

Byddai'n foment anhygoel i mi arwain yr hogiau allan yn Manchester City Garry Monk

"Mae'n beth mawr i mi arwyddo cytundeb fydd yn mynd â fi at ddiwedd fy 10fed blwyddyn," meddai Monk.

"Mae'n rhywbeth dwi'n falch ohono, mae fy nheulu i'n falch a dwi wedi gweithio'n galed amdano.

"Mae'n deimlad gwych gwybod y gallaf gynrychioli fy nghlwb am dair blynedd arall o leia'.

"Dwi wedi mwynhau pob eiliad. O'r diwrnod cynta' y cerddais i mewn yma o dan Kenny (Jackett, cyn reolwr), dwi wedi gweld datblygiad mawr yn y chwaraewyr a'r clwb.

"I fod yn rhan o hynny, ac fel capten am ran helaeth ohono, mae'n fraint anferthol."

'Moment anhygoel'

Os bydd Monk wedi gwella o anaf i'w droed erbyn dechrau ymgyrch Abertawe yn yr Uwchgynghrair yn Stadiwm Etihad, bydd ymhlith llond llaw o ddynion fydd wedi chwarae i'r clwb ymhob un o'r pedwar adran.

"Gobeithio y bydda' i'n dod 'nôl i ffitrwydd llawn cyn gynted â phosib. Byddai'n foment anhygoel i mi arwain yr hogiau allan yn Manchester City," ychwanegodd Monk.

"Ry'n ni wedi siarad ynglŷn â throi lan a sylweddoli beth sy'n mynd 'mlaen wedi rhyw bump neu chwe gêm. Da ni eisiau bod yn barod o'r cychwyn cynta'.

"Ry'n ni'n chwarae yn erbyn chwaraewyr gwych a thîm gwych, ond mae gennym ni garfan dda yma a ry'n ni eisiau dangos i'r gwrthwynebwyr beth allwn ni ei wneud a gweld sut maen nhw'n ymdopi."