British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Iau, 4 Awst 2011, 05:54 GMT 06:54 UK
Americanwr yn mwynhau ei Eisteddfod gyntaf

Alys Lewis
BBC Cymru

Ian Samways
Mae Ian wedi bod yn treulio llawer o amser ym Maes D

Mae'n siŵr bod Ian Samways wedi teithio ymhellach nag unrhyw gystadleuydd arall i gymryd rhan yn yr Eisteddfod.

O ddinas Pittsburgh yn Pennsylvania mae'n dod a hon yw ei Eisteddfod gyntaf.

Yn ogystal â mwynhau crwydro'r Maes a threulio amser efo dysgwyr eraill ym Maes D, mae Ian hefyd yn cystadlu.

"Dwi'n cymryd rhan yn y gystadleuaeth Llefaru Unigol i Ddysgwyr," meddai.

Bydd yn adrodd darn o farddoniaeth Aled Lewis Evans, Beirdd ar y Stryd.

"Mae'r ffaith bod y bardd yn yr Eisteddfod yn gyffrous ond hefyd yn rhoi pwysau ychwanegol arna i," ychwanegodd.

Teulu

Mae Ian wedi bod yn dysgu'r Gymraeg ers 2008 gyda 10 person arall yn Pittsburgh.

Mae'n ymddiddori'n fawr mewn ieithoedd a hefyd yn siarad Rwsieg ac ychydig o Ffrangeg, Almaeneg a Swedeg.

"Am ryw reswm roeddwn wedi anwybyddu'r Gymraeg.

"Yna un diwrnod penderfynais, oherwydd roedd gan fy mam achau Cymreig, y byddai'n dda petawn i'n dysgu'r iaith a chwarae fy rhan i'w chadw'n fyw."

Daeth ei rieni i'r Unol Daleithiau o Loegr cyn iddo gael ei eni a'i unig gysylltiad i Gymru yw trwy ei fam.

"Dwi ddim yn gwybod llawer am y cysylltiad 'mond y ffaith mai enw'r perthynas oedd Williams."

Arbennig

Mae bod ymysg cymaint o siaradwyr Cymraeg ar y Maes wedi bod yn brofiad arbennig iddo.

"Rydych chi'n gweld a chlywed ac anadlu'r Gymraeg," meddai.

"Mae'n ffrwydrad o'r iaith.

"Mae'n anhygoel i fod yn ei ganol, i ddod i le lle mae'r Gymraeg yn cael ei defnyddio gymaint."

Un o uchafbwyntiau ei ymweliad yw'r perfformiadau cerddorol ar y Maes, meddai.

"Mae lefel y talent yma yn anhygoel.

"Roeddwn eisoes wedi clywed am Fflur Dafydd yn yr Unol Daleithiau a chefais y cyfle i'w gweld hi'n fyw."

Uchafbwynt arall, meddai, oedd pa mor barod oedd pobl i helpu dysgwyr.

'Parch'

"Mae pobl wedi dangos amynedd a pharch tuag ata i fel dysgwr.

"Ac mae pobl hefyd wedi bod yn groesawgar iawn yn Llangollen lle dwi'n aros ac ar y bws bob dydd i Wrecsam."

Dywedodd fod nifer y bobl ddi-Gymraeg oedd yn ceisio dysgu'r iaith hefyd wedi creu argraff arno.

"Mae yna gymaint o Gymry di-Gymraeg a phobl sydd wedi symud yma o Loegr yn mynd i'r drafferth o ddysgu'r iaith.

"Ac mae'n dangos bod yna bobl heblaw Cymry Cymraeg yn barod i gadw'r iaith yn fyw."

Fe fydd ei ddosbarth yn Pittsburgh yn ail-ddechrau ym mis Medi.




NEWYDDION

POBOL Y BRIFWYL

LLUNIAU

150 O DDATHLU

ARCHIF NEWYDDION
SAIN A FIDEO
GWEFANNAU


CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific