Llundain 2012: A oes 'na fai ar y gwleidyddion?

Dywed Guto Harri ei bod yn hwyr yn y dydd i ddechrau cwyno

Mae Prif Swyddog y Wasg Maer Llundain yn cwestiynu a wnaeth gwleidyddion Cymru ddigon i geisio denu mwy o gampau'r Gemau Olympaidd i Gymru.

Daeth sylwadau Guto Harri ar ôl i Brif Weinidog Cymru Carwyn Jones ddweud ei bod hi'n anffodus nad oedd mwy o ddigwyddiadau yn ymwneud â'r gemau yng Nghymru.

Ar raglen y Post Cynta dywedodd Mr Harri y byddai'r Deyrnas Unedig gyfan yn elwa ar y gemau.

"Ma' bach yn hwyr i gwyno nad oes digon wedi cael ei ddosrannu i Gymru achos maen nhw fwy neu lai wedi setlo'r pethau yma ers blynyddoedd lawer.

"A wnaeth Carwyn a'r bobl eraill o'i gwmpas ddigon yn y dyddiau cynnar i gynnig Cymru fel lleoliad?

"Fe alla i yn hawdd ddychmygu'r hwylio yn digwydd yng Nghymru, y beicio mynydd yn digwydd, y canŵio efallai ...

"Mae'n her oherwydd y pellter ond mae'r hwylio yn Weymouth ac mae Weymouth ryw dair awr i ffwrdd.

"A wnaeth gwleidyddion Cymru, y bobl busnes gais iawn ...?"

Dywedodd Llywodraeth Cymru nad oedd ganddyn nhw sylw am yr hyn ddywedodd Mr Harri.