Radio Ceredigion yn gwadu gwahardd Elin Jones

Mae Elin Jones wedi cynrychioli Ceredigion yn y Cynulliad er 1999

Mae rheolwr Radio Ceredigion wedi gwadu honiadau gan yr Aelod Cynulliad lleol fod yr orsaf wedi ei gwahardd.

Mae Elin Jones yn honni bod un o'i hetholwyr, a gafodd ei gyfweld gan yr orsaf, wedi ei rybuddio i beidio dweud ei henw ar yr awyr.

Mae hi'n honni fod hyn wedi digwydd am iddi wrthwynebu cais gan yr orsaf i ddarlledu llai o Gymraeg.

Yr wythnos diwethaf, cyhoeddodd rheoleiddwyr y diwydiant, Ofcom, eu bod wedi gwrthod y cais gan berchnogion yr orsaf, Town and Country Broadcasting (TCB).

Dydyn ni ddim yn gweithredu system gwahardd ar unrhyw un o'n gorsafoedd radio Martin Mumford, Rheolwr Gyfarwyddwr TCB

Ond mae rheolwr yr orsaf wedi ymateb i honiadau Ms Jones gan ddweud nad yw hi wedi ei gwahardd a bod eitemau yn cael eu hystyried o ran haeddiant golygyddol.

Dywedodd TCB fod gan y cwmni perthynas dda gyda gwleidyddion.

'Cyfarfod'

Anfonodd reolwr gyfarwyddwr TCB, Martin Mumford lythyr at Ms Jones sydd bellach wedi ymddangos ar ei gwefan.

Dywedodd Mr Mumford: "Rwy'n siomedig eich bod chi wedi penderfynu cyhoeddi datganiad cyhoeddus negyddol arall ynglŷn â Radio Ceredigion ac rwy'n gofyn unwaith eto am y cyfle i gyfarfod â chi."

Dywedodd Mr Mumford wrth y BBC: " Dydyn ni ddim yn gweithredu system gwahardd ar unrhyw un o'n gorsafoedd radio.

"Rydyn ni'n ystyried bob eitem newyddion o ran haeddiant golygyddol.

"Mae genyn ni berthynas da gydag ASau ac ACau yng Nghymru."