British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 8 Gorffennaf 2011, 06:32 GMT 07:32 UK
Dechrau cynhyrchu ynni haul

Parc Solar Rhosygilwen yn Sir Benfro
Cafodd bron 10,000 o baneli solar eu gosod ar gyfer y cynllun

Mae disgwyl i barc solar cyntaf Cymru ddechrau cynhyrchu trydan yn ddiweddarach ddydd Gwener ar stad Rhosygilwen yn Sir Benfro.

Cafodd bron 10,000 o baneli solar eu mewnforio o'r Unol Daleithiau a'u gosod mewn 12 rhes ar gae chwe erw.

Bydd y buddsoddiad £2.5 miliwn yn weithredol tair wythnos cyn i lywodraeth y DU leihau'r cymhorthdal i fuddsoddwyr mawr mewn ynni haul.

Gobaith y perchnogion, Western Solas, yw dyblu maint y cynllun.

Pensiwn

Dywedodd perchennog y safle, Dr Glen Peters:

"Mae 10,000 o baneli yma. Dyma'r dechnoleg ddiweddaraf o'r Unol Daleithiau.

"Maen nhw'n gymwys i'r hinsawdd yma o awyr gymylog ar y cyfan."

Roedd ganddo ganiatâd cynllunio ar gyfer datblygiad dwywaith y maint presennol, ond bu'n rhaid iddo ailfeddwl.

"Doedd dim arian ar gael gan y banciau. Roedd rhaid i mi wedyn gymryd cam mawr a dweud 'o'r gorau - fe wnawn ni haneru maint y cynllun a gwneud datblygiad 1 Megawatt (MW) i gychwyn' ac yn y bôn cymryd arian o fy nghynllun pensiwn."

Mae ceisiadau am barciau solar eraill yng Nghynheidre a Ffos Las yng ngorllewin Cymru yn mynd drwy'r broses gynllunio ar hyn o bryd.

Cymhorthdal

Mae Adran Ynni a Newid Hinsawdd y llywodraeth wedi dweud fod y cymhorthdal i ffermydd solar mawr yn cael ei leihau o Awst 1.

Bydd ffermydd dros 250 kiloWatt (kW) hyd at 5 MW yn cael hawlio 8.5 ceiniog am bob kW/awr.

I gynlluniau rhwng 150 a 250 kW, y tal fydd 15c, ac i rai rhwng 50 a 150 kW - 19c.

Gyda'r diwydiant ynni haul yn tyfu dros y flwyddyn ddiwethaf o gynhyrchu 4 MW ym Mhrydain i 96MW, mae Dr Owen Guy o Brifysgol Abertawe yn credu fod pryderon y bydd yr ehangu yma'n arafu.

Dywedodd: "Mae'r cymhorthdal yn dal ar gael i gynlluniau bach.

"Gall unigolion osod sustem 4 kW ar eu cartrefi a pharhau i gael arian da am eu buddsoddiad.

"Ond ni fydd cwmnïau mawr yn gallu gwneud yr un elw ag y maen nhw wedi bod yn ei wneud."



HEFYD
Brys i godi parciau solar
05 Ebr 11 |  Newyddion
Golau gwyrdd i baneli solar
17 Chwef 11 |  Newyddion
Prosiect ynni: 85 o swyddi
09 Chwef 11 |  Newyddion
Cynlluniau ar gyfer parc solar
27 Ion 11 |  Newyddion


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific