Llofruddiaeth: Cyhuddo dyn 20 oed

Roedd Lewis Clarke ar fin ymuno gyda'r Llynges Frenhinol ym mis Tachwedd

Mae dyn 20 oed wedi cael ei gyhuddo o lofruddiaeth yn dilyn marwolaeth Lewis Clarke yn Llanidloes nos Sadwrn.

Bu farw Mr Clarke, 19 oed, yn dilyn digwyddiad yn Nhŷ Pumlumon yn y dref.

Cafodd ei gludo mewn hofrennydd i Ysbyty Amwythig ond bu farw'n ddiweddarach.

Bydd y dyn 20 oed yn ymddangos gerbron ynadon Llandrindod fore Mercher.

Yn y cyfamser, mae teulu Lewis Clarke wedi bod yn talu teyrnged iddo.

Dywedodd ei fam, Gale Morris, ei fod ar fin ymuno gyda'r Llynges ym mis Tachwedd.

Dywedodd: "Roedd yn fachgen poblogaidd gyda hoffter mawr o gerddoriaeth ac actio, ac roedd yn fachgen penderfynol iawn."

Ychwanegodd ei dad, Sean Clarke: "Rydym fel teulu wedi ein chwalu o golli Lewis.

"Roedd llawer o bobl yn ei garu'n fawr, ac rydym i gyd yn falch iawn ohono fe."

Mae'r heddlu yn parhau i apelio am dystion i'r digwyddiad.

Dylai unrhyw un â gwybodaeth ffonio 101, 01267 222020, neu Taclo'r Tacle ar 0800 555 111.