Cymorth cyfreithiol: Toriadau yn creu "tagfa"?

Mae'r Weinyddiaeth Cyfiawnder yn bwriadu torri cost cymorth cyfreithiol o £300 miliwn.

Mae cyfreithiwr blaenllaw yn honni y gall toriadau i gymorth cyfreithiol greu "tagfa" o fewn llysoedd Cymru.

Dywed Michael Imperato y gall rhai gwrandawiadau gymryd hyd at 60 gwaith fwy o amser na'r drefn bresennol.

Mae ystadegau yn dangos bod Cymru yn fwy dibynnol ar gymorth cyfreithiol na rhannau eraill o'r DU.

Mae'r Weinyddiaeth Cyfiawnder yn bwriadu torri cost cymorth cyfreithiol o £300 miliwn.

Bydd cymorth cyfreithiol dal ar gael i bobl sydd mewn peryg o ddioddef trais difrifol neu sydd mewn peryg o golli eu cartrefi Y Weinyddiaeth Cyfiawnder

Maen nhw'n honni bod angen moderneiddio'r system bresennol.

Mr Imperato yw arlywydd newydd Cymdeithas Cyfreithwyr Caerdydd a'r Cylch sy'n cynrychioli 1,000 ym myd y gyfraith.

'llai o arian'

Mae e'n pryderu na fydd carfan o bobl yn gallu fforddio cyflogi cyfreithiwr na bargyfreithwyr.

Mae ffigurau Canolfan Cyngor ar Bopeth ar gyfer y llynedd yn dangos bod 14% o'r bobl oedd angen help cyfreithiol wedi gofyn am y posibilrwydd o gael cymorth cyfreithiol.

Mae'r nifer hwn yn 5% yn fwy na'r ffigwr ar gyfer y DU.

Dywedodd Erika Helps, prif weithredwr Canolfan Cyngor ar Bopeth Rhondda Cynon Taf: "Mae'r ffigyrau hyn yn dangos fod pobl yng Nghymru, ar gyfartaledd, yn fwy dibynnol ar gymorth cyfreithiol na'u cyfoedion yng ngweddill y DU.

"Bydd mwy o bobl yn gorfod cynrychioli eu hunain gan y bydd llai o arian ar gael ar gyfer cymorth cyfreithiol."

Ar hyn o bryd mae 215,000 o achosion cyfreithiol teuluol yn cael eu gwrando mewn llysoedd yng Nghymru a Lloegr bob blwyddyn.

Mewn datganiad, dywedodd Y Weinyddiaeth Cyfiawnder: "Mae angen symleiddio a moderneiddio'r system gyfreithiol ac rydyn ni'n gwella'r wybodaeth a chefnogaeth ar gyfer pobl sydd eisiau cynrychioli eu hunain.

"Bydd cymorth cyfreithiol dal ar gael i bobl sydd mewn peryg o ddioddef trais difrifol neu sydd mewn peryg o golli eu cartrefi.

"Ond mae gennyn ni un o'r systemau cymorth cyfreithiol drutaf yn y byd ac rydyn ni'n methu ei fforddio rhagor."