Cyfnod newydd i hen hufenfa?

Fe gaeodd yr hufenfa yn 1994

Mae cynlluniau ar y gweill i ailagor rhan o Hufenfa Hendy Gwyn ar Daf gafodd ei chau yn 1994.

Bwriad cwmni The Proper Welsh Milk Company yw codi uned brosesu ar gost o £1.4 miliwn.

Dywedodd y cwmni mai'r gobaith yw cyflogi hyd at 60 o bobl o fewn pum mlynedd.

Mae disgwyl i i Bwyllgor Cynllunio Sir Gâr drafod y cais ym mis Awst.

Ar hyn o bryd, meddai'r cwmni, mae 90% o laeth de Cymru yn cael ei brosesu yn Lloegr cyn cael werthu yng Nghymru.

Byddai'r safle yn cael ei gyflenwi gan ffermwyr llaeth Sir Gaerfyrddin a Sir Benfro.

'Cysylltiadau'

Dywedodd llefarydd ar ran y cwmni: "Mae'r safle'n un gwych o ran cysylltiadau ffyrdd.

"Rydyn ni'n rhagweld taw un tancer 14,000 litr fydd yn gadael y safle bob dau ddiwrnod.

"Fe fyddai hynny'n cynyddu i bum tancer a 10 lori'r diwrnod ymhen pum mlynedd."

Y gred yw bod archfarchnadoedd Tesco a Morrison wedi mynegi diddordeb mewn gwerthu'r cynnyrch.

Mae'r cwmni hefyd wedi trafod â byrddau iechyd lleol sydd ar hyn o bryd yn prynu llaeth o ffatrïoedd yn Southampton a Llundain.

Roedd yr hen hufenfa ar safle 19 erw ac ar un adeg roedd 1,400 o ffermwyr llaeth y gorllewin yn cyflenwi'r safle.