British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 20 Mehefin 2011, 08:15 GMT 09:15 UK
Soprano o Moldova yn dod i'r brig

Valentina Nafornita
Roedd Valentina Nafornita yn gantores bop cyn troi at opera

Y soprano Valentina Nafornita, o Moldova, ddaeth i'r brig yng nghystadleuaeth BBC Canwr y Byd Caerdydd 2011.

Enillodd y ferch 24 oed Wobr y Gynulleidfa hefyd - bellach wedi ei henwi'n Wobr y Fonesig Joan Sutherland - sy'n cael ei benderfynu gan wrandawyr a gwylwyr teledu.

Y Fonesig Sutherland oedd un o feirniaid cynta'r gystadleuaeth a'i noddwr cyntaf hyd ei marwolaeth yn ddiweddar.

Roedd Nafornita ymhlith pump o gantorion fu'n perfformio o flaen panel yn y rownd derfynol yn Neuadd Dewi Sant yng Nghaerdydd nos Sul.

"Dwi mor hapus, rwy'n teimlo 'mod i yn y nefoedd ar hyn o bryd. Mae'n golygu popeth i mi," meddai'r gantores wedi'r gystadleuaeth.

Roedd Meeta Raval o Loegr, Olysya Petrova o Rwsia, Hye Jung Lee o Dde Corea ac Andrei Bondarenko o'r Wcráin hefyd yn cystadlu am y brif wobr £15,000.

Beirniaid

Cipiodd y bariton Bondarenko wobr arall y gystadleuaeth, Gwobr y Datganiad, nos Wener.

Bu Ms Nafornita yn perfformio rhaglen o waith y cyfansoddwyr Donizetti, Dvorak a Gounod.

Ymhlith y beirniaid yr oedd y Fonesig Kiri Te Kanawa, yr arweinydd o Rwsia Alexander Polianichko, Lorenzo Mariani - cyfarwyddwr artistig Tŷ Opera Palermo yn yr Eidal, y mezzo-soprano Marilyn Horne, y tenor Dennis O'Neill a'r bariton Håkan Hagegård.

Yn ogystal â'r brif wobr, cafodd Ms Nafornita hefyd Wobr y Gynulleidfa, gwerth £2,000.

Roedd 600 o gantorion wedi ceisio am le yn y gystadleuaeth, sy'n cael ei chynnal pob dwy flynedd ac yn para wythnos.

Cafodd 20 o gantorion o ar draws y byd eu dewis.

Cafodd y digwyddiad ei sefydlu yn 1983 gan BBC Cymru.

Ymhlith cyn enillwyr y mae Karita Mattila, Dmitri Hvorostovsky ac Ekaterina Scherbachenko.



HEFYD
Nodyn uchel
11 Maw 11 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific