British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 17 Mehefin 2011, 10:26 GMT 11:26 UK
Lleihau hunanladdiadau ar y rheilffordd

Gorsaf drn Abertawe
Mae'r cynllun pum mlynedd wedi ei gefnogi gan 5m o fuddsoddiant gan Network Rail

Mae elusen yn honni bod cynllun i hyfforddi staff y rhwydwaith rheilffordd wedi llwyddo i leihau nifer y bobl sy'n lladd eu hunain ar reilffyrdd Cymru.

Dywedodd y Samariaid fod chwech o bobl wedi cyflawni hunanladdiad ar reilffyrdd Cymru rhwng Ebrill 2010 ac Ebrill 2011.

Mae hyn yn dri yn llai na'r nifer o bobl wnaeth ladd eu hunain ar y rhwydwaith rheilffordd yn ystod yr un cyfnod rhwng 2009 a 2010.

Yn ôl ystadegau'r elusen hefyd mae nifer y bobl a laddodd eu hunain ym Mhrydain wedi gostwng o 233 i 207 yn ystod yr un cyfnod.

Mae dros 1,000 o staff mewn 220 lleoliad sy'n rhan o'r rhwydwaith rheilffordd ym Mhrydain wedi derbyn hyfforddiant arbenigol gan y Samariaid.

Cymorth

Mae'r cynllun pum mlynedd wedi ei gefnogi gan £5 miliwn o fuddsoddiad gan Network Rail.

Mae'r cynllun yn cynnwys hyfforddi staff i annog unigolion i symud i ffwrdd o fannau peryg a chynnig cymorth i yrwyr trenau ar ôl achos o hunanladdiad.

Dywedodd Simon Hatch, Cyfarwyddwr y Samariaid yng Nghymru: "Hon yw'r bartneriaeth gydlynol gyntaf i geisio lleihau'r nifer o bobl sy'n lladd eu hunain ar rwydwaith rheilffordd Prydain.

"Er bod y gostyngiad yn y nifer o farwolaethau yng Nghymru yn fychan mae'n galonogol fod y niferoedd yn lleihau."

Dywedodd David Higgins, Prif Weithredwr Network Rail: "Eisoes mae ein staff sydd wedi cael eu hyfforddi gan y Samariaid wedi ymyrryd i atal pobl rhag lladd eu hunain.

"Mae pob achos o hunanladdiad yn drasiedi i deuluoedd y rheini sy'n lladd eu hunain yn ogystal ag effeithio ar staff a theithwyr."



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific