Y Prif Weinidog yn cefnogi maes awyr Caerdydd

Bu'r cwmni yn hedfan o Gaerdydd ers 2002

Mae'r Prif Weinidog wedi mynegi pryder am ddyfodol Maes Awyr Caerdydd.

Yn ystod sesiwn holi'r Prif Weinidog dywedodd Carwyn Jones y byddai ei lywodraeth yn gweithio gyda pherchnogion y maes awyr er mwyn rhoi hwb i dwf yno, ond dywedodd bod angen edrych yn fanwl ar ei ddyfodol.

Yn ôl ystadegau a gyhoeddwyd ddydd Mawrth roedd gostyngiad o 14% yn nifer y teithwyr ddefnyddiodd faes awyr Caerdydd yn 2010 a gostyngodd y nwyddau a gludwyd trwy'r awyrle o 84% i 28 tunnell.

Cyhoeddodd cwmni hedfan bmibaby fis Ebrill ei bod yn dod a'r gwasanaeth o'r maes awyr i ben, sy'n golygu dim mwy o wasanaeth i gyrchfannau fel Genefa ac Ibiza.

Pryder

"Rwy'n pryderu am ddyfodol y maes awyr gan fod bmibaby yn gadael - does dim un cwmni awyr yn defnyddio'r maes fel ei chanolfan, mae'n bwysig sefydlu canolfan felly ac rwy'n credu bod eisiau edrych yn fanwl ar ddyfodol y maes awyr," meddai Mr Jones.

"Fe fyddwn ni'n ceisio datrys sut i sicrhau'r dyfodol hwnnw gyda pherchnogion y maes awyr i sicrhau twf yno yn y blynyddoedd i ddod yn hytrach na bod cwmnïau awyr, am ryw reswm, yn gadael."

Mae'r Ceidwadwyr hefyd wedi lleisio pryder am y sefyllfa.

"Er nad yw'r ystadegau heddiw yn synnu neb, maen nhw unwaith eto yn ergyd i faes awyr Caerdydd," meddai Byron Davies AC, gweinidog yr wrthblaid dros Drafnidiaeth.

"Mae'r ddarpariaeth teithio ryngwladol sydd ar gael o ac i Gymru yn dirywio ac mae'n niweidio busnesu Cymreig ac yn gwneud Cymru'n lle llai deniadol i fuddsoddi ynddo.

"Rhaid i Weinidogion Llafur eistedd i lawr gyda phenaethiaid Maes Awyr Caerdydd i ddatblygu strategaeth glir i atal dirywiad y maes awyr a gwneud Caerdydd yn lle mwy deniadol i ddarpar fuddsoddwyr."