British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 3 Mehefin 2011, 08:56 GMT 09:56 UK
Antigua: Cwpl yn "ffrindiau mynwesol"

Ben a Catherine Mullany
Roedd Ben a Catherine Mullany ar ddiwrnod olaf eu mis mÍl

Mae llys wedi clywed fod y cwpl o dde Cymru a lofruddiwyd ar eu mis mêl yn y Caribî yn "ffrindiau mynwesol".

Cafodd Ben a Catherine Mullany o Bontardawe eu saethu ar ddiwrnod olaf eu mis mêl yng Ngwesty Cocos ym mis Gorffennaf 2008.

Dywedodd brawd Mrs Mullany, Richard Bowen, wrth Uchel Lys Antigua fod y cwpl "yn gwneud popeth gyda'i gilydd".

Mae Avie Howell, 20 oed, a Kaniel Martin, 23 oed, yn gwadu llofruddio'r ddau, ac yn gwadu llofruddio siopwraig lleol, Woneta Anderson, 43 oed.

'Ffrindiau agosaf'

Bu farw Mrs Mullany, a oedd newydd gymhwyso fel meddyg - yn syth.

Cafodd Mr Mullany, cyn heddwas gyda Heddlu Sir De Efrog a chyn aelod o'r fyddin, ei gludo yn ôl i Gymru ond bu farw wythnos yn ddiweddarach yn Ysbyty Treforys, Abertawe.

Cafodd brawd Mrs Mullany, Richard Bowen, ei alw i roi tystiolaeth.

Golygfa cyffredinol o'r bythynod yng Ngwesty Cocos, Antigua
Roedd Ben a Catherine Mullany yn aros mewn bwthyn pan gawson nhw eu saethu

Dywedodd ei fod wedi gorfod adnabod corff ei chwaer dridiau ar ôl y saethu ac iddo ymweld â'i frawd-yng-nghyfraith.

"Roedd Ben yn un o fy ffrindiau agosaf," meddai.

"Beth bynnag fyddwn ni fel ffrindiau yn ei wneud fe fyddai Ben a Catherine yno."

Ffôn symudol

Dywedodd wrth y llys fod ei chwaer wedi priodi ar Orffennaf 12 cyn gadael am ei mis mêl.

Wrth y rheithgor dywedodd bod gan Mr Mullany ffôn symudol Nokia oedd yn cael ei ddefnyddio i wrando ar gerddoriaeth, tynnu lluniau ac anfon negeseuon i deulu a ffrindiau.

Mae'r llys wedi clywed tystiolaeth bod y ffôn ym meddiant y diffynyddion ar ôl y llofruddiaethau.

Yn gynharach, clywodd y llys gan swyddog diogelwch nad oedd 'na glo ar y glwyd oedd yn arwain at y bythynnod gwyliau pan gafodd Mr a Mrs Mullany eu llofruddio.

Dywedodd Brinsley Barrie wrth y llys mai ei swydd o oedd cau'r glwyd gyda'r nos ond na wnaeth ei gloi yn iawn.

Ar y diwrnod dan sylw doedd 'na ddim clo ar y glwyd bren dim ond bollt a "darn o haearn".

Ychwanegodd fod modd agor y glwyd i'r gwesty "heb fawr o drafferth".

Roedd Mr Barrie ar ddyletswydd pan ymosodwyd ar y cwpl yn eu bwthyn ar Orffennaf 26 2008 ond dywedodd wrth y llys na fyddai modd clywed yr ergydion yn y dderbynfa.

Cytunodd y gallai gwestai oedd wedi eu cloi allan yn hwyr yn y nos fynd i mewn i'r safle "heb fawr o drafferth".

Pan ofynnwyd iddo a allai rhywun ddringo dros y rhwystr, cytunodd y gallai hynny ddigwydd.

Ffonio'r heddlu

Roedd Mr Barrie ar ddyletswydd gyda'i gyd-weithwyr, Ian Newell a Tony Martin.

Clywodd y llys ei fod yn ardal y dderbynfa pan wnaeth Mr Martin gyrraedd yno "wedi dychryn" ac yn methu siarad yn eglur.

Dywedodd wrth y rheithgor ei fod wedi mynd i fyny'r bryn i fwthyn 15, lleoliad y llofruddiaethau.

Roedd Mr Mullany yn "penlinio dros y gwely" ond doedd o ddim yn symud ac roedd gwaed yn llifo o gefn ei ben.

Roedd Mrs Mullany yn gorwedd ar ei chefn ar y llawr.

"Roedd 'na waed ar ei hwyneb, doedd hi ddim yn symud. Roedd hi i'w weld wedi marw."

Eglurodd ei fod wedi dychwelyd i'r dderbynfa i ffonio'r heddlu.

Mae'r achos yn parhau.



HEFYD
Antigua: 'Dim clo ar y glwyd'
02 Meh 11 |  Newyddion
Mis mÍl: Tystiolaeth parafeddyg
02 Meh 11 |  Newyddion
Mis mÍl: Achos llys yn dechrau
01 Meh 11 |  Newyddion


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific