British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Gwener, 27 Mai 2011, 20:45 GMT 21:45 UK
Buddugoliaeth gyntaf i Speed

Aaron Ramsey
Sgoriodd Aaron Ramsey ei drydedd gol dros ei wlad

Cafodd Cymru eu buddugoliaeth gyntaf o dan reolaeth Gary Speed wrth guro Gogledd Iwerddon o ddwy gol i ddim yn Nulyn.

Gyda saith o'r tîm yn ennill eu bara menyn yn Uwchgynghrair Lloegr, Cymru oedd a'r tîm cryfa' ar bapur, ac felly y profodd hi.

Gallai Cymru fod wedi mynd ar y blaen yn gynnar wrth i David Vaughan ganfod Steve Morison, ond daeth tacl dda Colin Coates i'w rwystro.

Ond daeth cyfle llawer gwell wedi 17 o funudau wrth i Morison benio at Aaron Ramsey yn y cwrt chwech, ond rywsut fe darodd Ramsey ei ergyd heibio'r postyn.

Fe gafodd Gogledd Iwerddon am bell gyfle, ond fe arbedodd Wayne Hennessey un cynnig o bell gan Niall McGinn.

Ramsey

Yna wedi 36 o funudau fe wnaeth Ramsey yn iawn am ei gamgymeriad yn gynharach. Dyrnodd golgeidwad y Gwyddelod ergyd Craig Bellamy at draed Ramsey, ac fe darodd yntau gefn y rhwyd o ugain llath.

Roedd y dorf yn Stadiwm Aviva yn siomedig tu hwnt, ond nid yn annisgwyl efallai o weld fod y ddau dîm wedi colli eu dwy gêm flaenorol yng nghystadleuaeth Cwpan y Cenhedloedd.

Ond daeth mwy o godi calon y cefnogwyr o Gymru oedd wedi gwneud y daith i Ddulyn wedi 69 munud.

Er fod tri amddiffynnwr o'i gwmpas pan dderbyniodd Robert Earnshaw y bel yn y cwrt cosbi, fe lwyddodd rhywsut i droi cyn tanio ergyd i gornel y rhwyd - dwy i ddim.

Haeddiannol

Gyda Gogledd Iwerddon yn methu creu cyfleoedd clir, fe fanteisiodd Gary Speed ar y cyfle i ddefnyddio'i eilyddion, a rhoi gorffwys i eraill.

Doedd dim gwir fygythiad i gol Hennessey, ac fe ddaliodd Cymru eu gafael ar y fantais am fuddugoliaeth haeddiannol.

Mae Cymru'n gorffen y gystadleuaeth yn y trydydd safle, gyda'r Alban a Gweriniaeth Iwerddon yn cwrdd i benderfynu'r ennillwyr.

Canlyniad :

Gogledd Iwerddon 0-2 Cymru(Ramsey, Earnshaw)



HEFYD
Chwaraewyr Cymru yn colli cyfle
25 Mai 11 |  Newyddion


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific