Nid llygredd ond algae

Daeth adroddiadau o draethau ledled Cymru

Algae sy'n gyfrifol am adroddiadau o garthffosiaeth ac olew ar draethau ledled Cymru yn ôl Asiantaeth yr Amgylchedd Cymru.

Mae adroddiadau o fudreddi ar draethau o Borthcawl a Dinbych-y-pysgod yn y de hyd at Aberdyfi a'r Fenai yn y gogledd.

Mae'n ymddangos fel lympiau brown yn y dŵr ac ar y lan.

Dywed yr Asiantaeth nad yw'r algae yn beryglus, ond y gallai achosi peth cosi poenus ar y croen.

Yn ol gwyddonwyr mae'r algae o rywogaeth chaetoceros a phaeocystis a ni ddylid ei lyncu na'i gyyffwrdd.

Mae'n cael ei greu gan gyfuniad o'r tywydd poeth diweddar ynghyd a maetholion yn y dŵr.

Gyda rhagolygon am fwy o dywydd cynnes dros yr haf, dywed yr Asiantaeth eu bod yn disgwyl mwy o'r algae ar hyd yr arfordir.

'Naturiol'

Dywedodd llefarydd: "Does dim tystiolaeth fod yr algae yn wenwynig i bobl, ond nid yw'n bleserus i edrych arno.

"Rydym yn cael mwy a mwy o alwadau gan bobl sy'n poeni am ei fod yn edrych fel llygredd.

"Gallwn sicrhau'r bobl yna ei fod yn ffenomenon naturiol, ond rydym yn falch fod pobl yn cymryd cymaint o ddiddordeb yn yr amgylchedd ac yn ein ffonio ni."

Ychwanegodd fod safon dwr nofio ar draethau yn well nag erioed.