Rhybydd am sefyllfa 'argyfyngus i ddarlledu Cymru

Dywed Mr Davies y byddai'n anodd cynnal gwasanaeth "cenedlaethol"

Mae cyn-reolwr BBC Cymru wedi y byddai toriadau i wasanaethau teledu a radio'r gorfforaeth yn arwain at sefyllfa "argyfyngus i ddarlledu yng Nghymru".

Roedd Geraint Talfan Davies yn ymateb i ddogfen a ddaeth i ddwylo'r wasg ddydd Mercher yn amlinellu ffyrdd posib o wneud toriadau o 20%.

Dywedodd Mr Davies y byddai toriadau o'r fath yn "annerbyniol" ac y byddai'n "anodd gweld sut y gellid "cynnal gwasanaeth sy'n cael ei alw'n wasanaeth Cenedlaethol."

Mae'r BBC yn ganolog wedi gofyn i BBC Cymru ystyried sut i wneud toriadau o hyd at 20%.

Mewn ymateb dywedodd y BBC nad ydyn nhw gwneud unrhyw benderfyniadau terfynol eto.

Roedd dogfen fewnol yn son am opsiynau posib - gan gynnwys torri nôl neu roi'r gorau i rai rhaglenni teledu a radio.

'Annerbyniol'

Mae awgrym yn y ddogfen y gallai toriadau olygu llai o ddarlledu o ddigwyddiadau cenedlaethol fel yr Eisteddfod Genedlaethol a'r Sioe Frenhinol yn Llanelwedd.

Mae'r BBC yn dweud mai dogfen drafod yn unig yw hi

Mae awgrym hefyd y gallai toriadau effeithio ar raglenni materion cyfoes, newyddion a chwaraeon.

Gallai dyfodol rhaglenni gwleidyddol fod yn y fantol - gan olygu diwedd ar Manylu a Dau o'r Bae ar Radio Cymru a rhaglenni teledu fel Week In Week Out ac elfen Gymreig The Politics Show.

Ar raglen newyddion BBC Cymru Post Cynta ddydd Iau dywedodd Mr Davies am y toriadau dan sylw:

"Maen nhw'n bownd o fod yn annerbyniol beth bynnag yw'r manylion - oherwydd mae'n anodd gweld sut y gellir cynnal gwasanaeth sy'n medru cael ei alw yn wasanaeth cenedlaethol ar radio neu deledu.

"Mae'n rhaid gofyn a ydi toriadau yn mynd i fod yn gyfartal ar draws y BBC neu a fydd yna flaenoriaeth i rai pethau.

"Dwi'n credu bod angen i ni yng Nghymru ddadlau fod angen blaenoriaethu'r gwasanaethau yng Nghymru.

"Mae sefyllfa ar ôl degawd o ddatganoli a newid mawr yn ein cymdeithas a gwendidau yn y cyfryngau sydd gennym ni yma yn golygu ein bod yn ddibynnol iawn ar y BBC."

'Dim penderfyniad'

Dywedodd hefyd y gallai'r toriadau yn y pendraw fod yn fygythiad i S4C.

Mae'r llywodraeth wedi cyhoeddi y bydd y BBC yn gyfrifol am ariannu rhan helaeth o S4C yn y dyfodol.

Dydd Mawrth mewn e-bost at holl staff y BBC dywedodd Cyfarwyddwr BBC Cymru Keith Jones nad oedd unrhywbeth yn bendant am y cynlluniau.

"Rwyf am ei gwneud yn hollol glir nad oes unrhyw benderfyniadau wedi'u gwneud ynglyn ag arbedion yn ystod y rhan hon o'r broses ...," meddai.

"Nid oes disgwyl i benderfyniadau terfynol gael eu gwneud tan yn hwyrach eleni.

"Bydd angen sêl bendith Ymddiriedolaeth y BBC ar yr argymhellion terfynol."