Banc: Cyhuddo dyn 24 oed o ladrata

Cafodd y ffordd ei chau wedi'r digwyddiad ddydd Iau

Mae'r heddlu wedi cyhuddo dyn 24 oed o Birmingham o ladrata, ar ôl i arian gael ei ddwyn oddi wrth swyddog diogelwch y tu allan i fanc.

Cafodd swm o arian ei ddwyn oddi wrth swyddog diogelwch wrth fynedfa Banc Barclays yn Heol Pentrerhedyn, Machynlleth am 11.45am ddydd Iau.

Cafodd y dyn ei arestio yn fuan wedi'r digwyddiad ac mae'r heddlu wedi dod o hyd i'r arian.

Mae'r heddlu'n parhau i chwilio am ddau ddyn arall mewn cysylltiad â'r lladrad.

Apêl

Dywedodd y Ditectif Brif Arolygydd Shane Williams: "Rydym yn chwilio am ddau ddyn gwyn sydd o dan amheuaeth.

"Rydym yn apelio ar unrhyw un welodd y dynion yng nghyffiniau Canolfan Hamdden Flash ac Allt Gungrog yn y Trallwng rhwng 12.30pm a 5pm ddydd Iau i gysylltu gyda'r heddlu ar 101.

"Mae'r dynion yn drwsiadus yr olwg ac yn eu dauddegau canol."

Llwyddodd y lladron i ddianc mewn car BMW du gafodd ei ollwng ym mhentref Llanwrin.

Wedyn fe yrron nhw gar Mercedes gwyn ac fe ddaeth yr heddlu o hyd i'r car hwnnw ger Canolfan Hamdden y Trallwng.

Dylai unrhyw un â gwybodaeth gysylltu â'r heddlu ar 101 neu Daclo'r Taclau yn ddienw ar 0800 555 111.