Jones yn galw am hyfforddwr newydd

Cyn gapten Cymru yn dweud y dylai'r Gweilch newid eu hyfforddwr a chael gwared a Sean Holley.

Mae cyn gapten rygbi Cymru, Gwyn Jones, yn dweud y dylai'r Gweilch newid eu hyfforddwr yn dilyn y golled o 18 i 11 yn erbyn Munster yn rownd gynderfynol Cynghrair Magners nos Sadwrn.

Er gwaetha'r sgôr agos, dim ond 45% o'r meddiant gafodd y Gweilch a 28% o'r tir.

Dywedodd Jones ar raglen Y Clwb Rygbi ar S4C y dylai'r hyfforddwr Sean Holley fynd.

Gofynnwyd i'r Gweilch ymateb i sylwadau dadleuol Gwyn Jones, ond hyd yma daeth dim ymateb.

Bydd dau o brif chwaraewyr y Gweilch - James Hook a Lee Byrne - yn gadael y rhanbarth i chwarae eu rygbi yn Ffrainc y tymor nesaf, ac fe fydd y prop Craig Mitchell a'r blaenasgellwr Marty Holah hefyd yn gadael y Liberty.