Zeta Jones yn cefnogi apêl i brynu fferm yn Eryri

Saif Llyndy Isaf yn nyffryn Nant Gwynant ger Beddgelert

Mae Catherine Zeta Jones wedi rhoi ei chefnogaeth i ymgyrch yr Ymddiriedolaeth Genedlaethol i brynu fferm yn Eryri.

Mae apêl yr actores yn dilyn un tebyg gan yr actor Matthew Rhys ynglŷn â phrynu safle 600 erw Llyndy Isaf.

Mae dros £500,000 wedi ei gyfrannu tua mis ar ôl i'r ymddiriedolaeth lansio apêl i sicrhau dyfodol un o dirluniau mwyaf gwerthfawr Eryri.

Ddydd Llun rhoddwyd hwb ychwanegol i'r ymgyrch i godi £1 miliwn wrth i'r actores Gymreig Catherine Zeta Jones ddatgan ei chefnogaeth:

Os na weithredwn nawr gallai datblygiad masnachol fygwth tawelwch y rhan arbennig hon o Eryri Catherine Zeta Jones

Saif Llyndy Isaf yn Nant Gwynant ger Beddgelert.

Mae'n gartref i lawer rhywogaeth o fywyd gwyllt sydd o bwysigrwydd cenedlaethol, yn cynnwys glas y dorlan, y dyfrgi a'r frân goesgoch.

Fferm ucheldir

Mae Ken Jones, sydd wedi bod yn ffermio LLyndy Isaf ers 35 mlynedd wedi penderfynu ymddeol.

Dywedodd Ms Zeta Jones: "Mae prydferthwch a thirwedd Eryri yn wirioneddol unigryw ac mae gennym un cyfle mewn oes i warchod Llyndy Isaf yn yr ardal neilltuol hon o Gymru i genedlaethau'r dyfodol.

Mae angen £500,000 arall i brynu'r fferm

"Os na weithredwn nawr gallai datblygiad masnachol fygwth tawelwch y rhan arbennig hon o Eryri."

Ychydig dros fis yn ôl galwodd yr actor Matthew Rhys ar bobl Cymru a thu hwnt i gynorthwyo'r apêl i godi'r arian i brynu'r fferm ar lan Llyn Dinas.

Dyma apêl gefn gwlad fwyaf yr Ymddiriedolaeth yn y Deyrnas Gyfunol ers dros ddeng mlynedd.

"Rydym wrth ein bodd gydag ymateb y cyhoedd", meddai Richard Neale, Rheolwr Cyffredinol yr Ymddiriedolaeth Genedlaethol yn Eryri.

'Blog'

"Rydym wedi cael cychwyn rhagorol i'r apêl i godi'r £1 miliwn angenrheidiol i sicrhau dyfodol Llyndy Isaf, diolch i garedigrwydd unigolion sydd wedi anfon cyfraniadau drwy'r post ac ar-lein."

"Pan lansiwyd yr apêl gennym dechreuais flog ac rydw i wedi cael fy syfrdanu gan yr ymateb.

"Mae pobl wedi bod yn fy holi am y lle, yn gofyn beth yw'r bygythiadau iddo a holi sut y gallent gyfrannu.

"Ond, er ein bod wedi cyrraedd hanner ffordd tuag at y targed ni allwn orffwys.

"Mae angen £500,000 arall i'n galluogi i brynu'r fferm a rhoi gwelliannau amgylcheddol hanfodol ar waith yn syth bin."

Ym 1998 gyda chefnogaeth llywydd yr ymddiriedolaeth bryd hynny, yr actor Syr Anthony Hopkins, codwyd £4 miliwn i brynu stad Hafod y Llan ar lethrau deheuol Yr Wyddfa.