Cyfri'r gogledd: Tro arall yn y stori

Mae tro arall yn stori cyfri pleidleisiau Etholiad y Cynulliad yn y gogledd wedi i gynghorwyr Sir Fflint fynnu bod pleidleisiau etholaethau'r sir yn cael eu cyfri dros nos yn hytrach na'r diwrnod canlynol.

Wrth bleidleisio o blaid cynnig i'r perwyl hwn, mae'r cynghorwyr hefyd wedi dweud y dylai Swyddog Etholiad a Phrif Weithredwr y sir, Colin Everett, ddilyn trefn sy'n wahanol i weddill cynghorau'r gogledd a chynnal y cyfrif dros nos ar Fai 5.

Mae'r cyngor wedi dweud na all ddweud wrth y Swyddog Etholiad sut i gyflawni ei ddyletswyddau.

Yn y sir mae etholaethau Delyn ac Alyn a Glannau Dyfrdwy.

Pob plaid

Mae gwrthod gweithredu penderfyniad democrataidd y cyngor llawn yn bryder mawr i mi Cynghorydd Bernie Attridge

Y Cynghorydd Bernie Attridge, ddywedodd fod pob plaid yn ei gefnogi, gyflwynodd y cynnig gerbron y cyngor llawn brynhawn Mawrth.

"Mae gwrthod gweithredu penderfyniad democrataidd y cyngor llawn yn bryder mawr i mi ac rwy'n ceisio am gyngor cyfreithiol ynglŷn â beth ddylai ddigwydd nesaf.

"Mae'n bosib y byddaf yn cyflwyno cynnig o ddiffyg hyder yn y prif weithredwr, gan alw am ei ymddiswyddiad."

Corddi

Ers wythnosau mae'r ffrae am amseru'r cyfri wedi bod yn corddi - ers y cyhoeddiad y byddai swyddogion etholiadol y gogledd yn aros tan 9am fore Mai 6 cyn dechrau cyfri'r pleidleisiau.

Felly ni fydd gwybodaeth lawn am ganlyniadau'r etholiad tan ddiwedd y prynhawn Gwener.

Dywedodd y cyngor: "Mae'r Swyddog Etholiad, sy wedi rhoi gwybod i'r cyngor beth yw'r rhesymau am y trefniadau sy eisoes mewn grym ar gyfer yr etholiad, wedi dweud na fydd yn eu newid."

Eisoes mae Swyddog Etholiad Rhanbarthol y gogledd, Dr Mohammed Mehmet, wedi wynebu galwadau gan y pedair prif blaid i newid ei feddwl a chynnal y cyfri noson y bleidlais.