Achos Porthmadog: Iestyn Davies yn euog

Gwelwyd Iestyn Davies ar gamera cylch cyfyng yn gadael ei fflat yn oriau mân bore Sadwrn

Yn Llys y Goron Caernarfon fe gafodd dyn 54 oed o Borthmadog ei garcharu am oes am lofruddio Ffion Wyn Roberts.

Roedd Iestyn Davies wedi gwadu cyhuddiad o lofruddiaeth.

Cafodd corff y weithwraig ofal 22 oed ei ganfod mewn ffos ddiwrnod ar ôl iddi fethu â dychwelyd ar ôl noson allan yn Nhremadog ar Ebrill 9 2010.

Roedd hi wedi boddi ac wedi cael ei thagu.

Ar ddiwedd achos wnaeth bara am saith wythnos bu'r rheithgor yn ystyried eu dyfarniad am dros 21 awr.

Cafwyd dyfarniad o fwyafrif 10-2.

'Peryglus iawn'

Dydd Gwener dywedodd y barnwr y byddai'n fodlon derbyn rheithfarn gan fwyafrif yr aelodau, a dyna gafwyd am 2pm brynhawn Llun.

Cafwyd hyd i gorff Ffion Wyn Roberts mewn ffos ym Mhorthmadog

Cafodd Davies ei ddedfrydu i garchar am oes, gyda'r barnwr Mr Ustus Lloyd Jones yn gosod lleiafswm o 25 mlynedd cyn y bydd yn cael gwneud cais am barôl.

Wrth gyhoeddi'r ddedfryd, dywedodd y barnwr fod Iestyn Davies "yn ddyn peryglus iawn, craff a chyfeiliornus".

Ychwanegodd: "Rwy'n siŵr fod cymhelliad rhywiol i'r drosedd hon, ac mae'n rhaid bod hynny wedi gwaethygu'r dioddefaint i Ffion.

"Fe'ch cafwyd yn euog ar dystiolaeth gref - roedd hon yn drosedd ffiaidd a gymerodd fywyd ifanc mewn modd ofnadwy."

Dywedodd fod Ffion yn darged hawdd am ei bod wedi meddwi.

"Roedd yn gyd-ddigwyddiad dychrynllyd bod llwybrau'r ddau ohonoch wedi croesi, ac ar fympwy fe welsoch chi'ch cyfle a'i gymryd," ychwaengodd.

Fideo'r heddlu o symudiadau olaf Ffion Wyn Roberts