Democratiaid Rhyddfrydol eisiau 'gwawr newydd o ddatganoli'

Bydd Kirsty Williams yn lawnsio ymgyrch ei phlaid yng Nghasnewydd ddydd Mawrth.

Dyma ymgyrch etholiadol bwysica'r Cynulliad - dyna oedd neges arweinydd y Democratiaid Rhyddfrydol yng Nghymru wrth lansio ymgyrch y blaid.

Mae'n dweud bod rhaid cael gwawr newydd o ddatganoli ar ôl etholiad Mai 5.

Bai Llafur a Phlaid Cymru yw problemau Cymru yn ôl Kirsty Williams ac mae hi'n addo y bydd ei phlaid yn canolbwyntio ar hybu twf economaidd, creu swyddi a gwella sgiliau os bydd ei phlaid yn llwyddiannus yn etholiad Mai 5.

Blaenoriaethu sgiliau

Roedd ymgyrchwyr yng ngholeg Gwent fore Mawrth er mwyn pwysleisio ymrwymiad y blaid i hybu sgiliau.

"Pleidleisiodd pobl Cymru o blaid cryfhau datganoli yn y refferendwm ond maen nhw hefyd eisiau iddo weithio'n well," meddai Ms Williams.

Addewidion y Democratiaid Rhyddfrydol Creu swyddi trwy roi grantiau hyfforddi - gwerth £2,000 yr un - i fusnesau newydd sy'n sefydlu yng Nghymru ac yn rhoi swyddi i bobl ifanc ddi-waith. Rhoi mwy o arian i ysgolion trwy roi cyllid ychwanegol i ddisgyblion sydd ei angen fwyaf fel y gall ysgolion fuddsoddi mewn dosbarthiadau llai neu addysg un-i-un a thrwy hynny, daclo'r gwahaniaeth mewn gwariant rhwng Cymru a Lloegr. Torri amser aros am driniaeth trwy gael gwared â gwastraff. Gwella gofal iechyd trwy symud gwariant aneffeithiol yn y gwasanaeth iechyd i'r rheng flaen. Ailwampio radical o effeithlonrwydd ynni 12,000 yn fwy o dai trwy ddyblu'r cyllid fydd ar gael i daclo tlodi tanwydd. Torri ar y cyfyngiadau sy'n atal cynghorau rhag mentro a gweithredu er lles y gymuned leol.

"Rhaid cael gwawr newydd o ddatganoli nawr.

"Mae'r etholiad yma am y math o lywodraeth sydd ei angen ar Gymru."

'Dim mwy o esgusodion'

Dywedodd bod Llafur a Phlaid Cymru wedi gadael y wlad gydag economi wan, ysgolion heb ddigon o gyllid a gwasanaeth iechyd sy'n ddrytach i'w redeg ond yn cyflawni llai.

"Does dim rhyfedd bod Llafur a Phlaid mor awyddus i osgoi siarad am eu record.

"Ac maen nhw wedi gwneud gwastraff a diffyg gallu yn grefft.

"Dim mwy o esgusodion. Mae'r Democratiaid Rhyddfrydol yn credu bod Cymru'n haeddu gwell."

Dywedodd bod gan y Democratiaid Rhyddfrydol bolisïau positif i greu Cymru well.

Un o gonglfeini'r ymgyrch fydd torri gwastraff yn y gwasanaeth iechyd a throsglwyddo'r cyllid i'r rheng flaen.

Mae'r Democratiaid Rhyddfrydol hefyd yn addo cau'r bwlch rhwng cyllidebau ysgolion yn Lloegr o gymharu â Chymru ac yn addo creu swyddi trwy dalu cwmnïau i hyfforddi gweithwyr newydd ifanc sydd wedi bod yn ddi-waith.