Gwely haul: Gwahardd rhai dan 18 oed

Fydd rhai dan 18 oed ddim yn cael defnyddio gwely haul

Bydd pobl dan 18 oed yn cael eu gwahardd rhag defnyddio gwely haul yng Nghymru a Lloegr.

Daw'r gwaharddiad i rym ar Ebrill 8.

Dydd Mawrth fe fydd ACau yn trafod cyfres o fesurau i ymestyn y ddeddf honno yng Nghymru.

Bwriad Gweinidog Iechyd Cymru, Edwina Hart, ydi gwahardd salonau gwelyau haul heb oruchwyliaeth yn gyfan gwbwl o fis Hydref ymlaen a thynhau'r rheolaeth o salonau eraill.

Mae hyn yn rhan o ymdrech i ymateb i bryderon ynglŷn ag effaith posib y gwelyau ar y croen.

Daeth hi'n bosibilrwydd i Lywodraeth y Cynulliad gyflwyno rheolaeth lymach ar ôl mesur aelod preifat yn Senedd San Steffan gan gyn Aelod Seneddol Gogledd Caerdydd, Julie Morgan.

Lleihau'r risg

O dan y canllawiau fe fyddai'n rhaid i'r salonau ddarparu cyfarpar addas i oruchwylio'r llygaid i oedolion sy'n defnyddio'r gwelyau haul ac i arddangos gwybodaeth iechyd sydd wedi ei gymeradwyo yn unig am effaith y gwelyau.

Yn ôl arolwg gan Ymchwil Canser UK yn 2009 gafodd ei gomisiynu gan Ms Hart, roedd 8.2% o blant 11-17 oed yng Nghymru wedi defnyddio gwely haul o leiaf unwaith gyda 16% yn dweud y byddan nhw'n ei ddefnyddio yn y dyfodol.

Edwina Hart am weld rheolau llymach

Roedd 41.5% o blant yn dweud eu bod wedi defnyddio'r gwelyau heb oruchwyliaeth.

"Mae effaith canser ar unigolion ac ar eu teuluoedd yn gallu bod yn ddinistriol ac fel llywodraeth rydym yn parhau i fod yn ceisio gwneud popeth posib i daclo canser," meddai Ms Hart.

"Er bod ein prif flaenoriaeth i warchod plant a phobl ifanc, fe fydd y rheolau newydd yn cynnig mwy o gyngor a gofal i oedolion hefyd."

Ychwanegodd Dr Tony Jewell, Prif Swyddog Meddygol Cymru, bod y gyfradd canser y croen wedi cynyddu yn y blynyddoedd diweddar ac mae'n cael ei gysylltu yn bennaf gydag ymbelydredd uwch-fioled.

"Rydym yn pryderu am y cynnydd mewn defnydd o'r gwelyau haul, yn enwedig gan bobl ifanc," meddai.

"Fe fyddai canllawiau yn cynorthwyo i leihau'r risg o niwed i'r croen a chanser."