British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 21 Mawrth 2011, 18:09 GMT
Dilysu: 'Angen mynd i'r afael'

Leighton Andrews
Dywedodd y gweinidog fod y brifysgol yn dal i ddefnyddio trefn ddilysu er bod pryderon amdani

Mae'r Gweinidog Addysg, Leighton Andrews, wedi dweud bod angen i Brifysgol Cymru fynd i'r afael â dilysu canolfannau newydd.

Dywedodd fod y brifysgol yn dal i ddefnyddio trefn arbennig er bod pryderon amdani.

Mae'r Asiantaeth Sicrwydd Ansawdd, y corff sy'n arolygu safonau addysg uwch, yn ymchwilio i Brifysgol Cymru oherwydd canolfan yn Singapore wedi "nifer o gwynion oddi wrth fyfyrwyr" ym mis Ionawr.

Dywedodd yr asiantaeth fod yr ymchwiliad yn ymwneud â safonau academaidd ac ansawdd yn Ysgol Fusnes Turning Point.

Yn y cyfamser, mae'r asiantaeth wedi mynnu cynllun gweithredu ac amserlen sy'n dangos pa gamau sy'n cael eu cymryd er mwyn sicrhau bod trefn ddilysu canolfannau'n effeithiol.

'Yn bellgyrhaeddol'

Mae'n debyg y bydd y brifysgol yn cael ei beirniadu mewn adolygiad fydd yn cael ei gyhoeddi ddydd Mawrth.

Dywedodd y gweinidog fod Adolygiad McCormick wedi casglu bod rhaid i'r brifysgol "newid yn bellgyrhaeddol os yw'n mynd i gyfrannu at Gymru a'i diwylliant".

Fe fydd rhaid iddi, meddai, ystyried o ddifri ei strwythur a'i rôl yn y dyfodol.

Ym mis Tachwedd fe ymchwiliodd rhaglen Week In Week Out i ddau goleg tramor oedd yn cynnig cymwysterau Prifysgol Cymru.

Mewn datganiad, dywedodd llefarydd ar ran Prifysgol Cymru nad oeddan nhw'n ymwybodol o'r materion cyn hyn ac nad oedd y gweinidog wedi cysylltu â nhw i drafod.

Dywedon nhw na fyddan nhw'n gwneud unrhyw sylw nes eu bod wedi ystyried yr adroddiadau perthnasol gan yr Asiantaeth Sicrwydd Ansawdd a Chyngor Cyllido Addysg Uwch Cymru.

Yn y cyfamser, dywedon nhw fod Prifysgol Cymru yn ceisio cyflawni eu cyfrifoldebau academaidd yn ddiwyd iawn, gan gydweithio gyda phartneriaid i ddarparu sefydliad addysg uwch cyffrous i Gymru a'u bod yn cydweithio gyda sefydliadau dramor i gyflawni eu cenhadaeth fyd-eang, gan gynnwys dod â rhai o academyddion mwya' blaenllaw'r byd i Gymru.



HEFYD
Graddau: Cyfarwyddwr yn ymddiswyddo
09 Tach 10 |  Newyddion
Amheuon dros gyswllt Prifysgol
09 Tach 10 |  Newyddion


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific