British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 14 Chwefror 2011, 08:32 GMT
'Argyfwng' yn arwain at rownd olaf cwmni llaeth

Poteli llefrith
Dywed undeb yr NFU fod angen sicrhau prisiau gwell i gynhyrchwyr llaeth

Mae cwmni llaeth yn ne Cymru yn rhoi'r gorau i'r busnes wrth i undebau amaethyddol rybuddio fod y diwydiant llaeth mewn sefyllfa argyfyngus.

Mae cwmni llaeth Bethesda yn Sir Benfro yn dweud na allan nhw gystadlu â'r archfarchnadoedd mawr.

Byddan nhw'n dosbarthu eu rownd olaf o laeth ymhen pythefnos.

Mae undeb amaethyddol NFU Cymru yn galw ar lywodraethau yng Nghymru, Prydain ac Ewrop i weithredu er mwyn magu hyder yn y diwydiant llaeth.

Maen nhw eisiau unioni patrwm prisiau presennol y diwydiant llaeth a rhoi hwb i hyder y sector.

Pris yn gostwng

Cafodd cwmni llaeth Bethesda ei sefydlu 10 mlynedd yn ôl ac mae'n cyflogi chwech o bobl.

Mae'r perchennog, Rob Gibby, yn dweud na all gystadlu yn erbyn y cwmnïau mawrion.

"Mae pethe wedi mynd yn rhy galed erbyn inni dalu am ddisel a chostau eraill, sy'n mynd lan," meddai.

"Wedyn ma' pris llaeth yn mynd i lawr yn y siopau."

Yn ôl Rob Gibby mae rhai siopau yn ddiweddar wedi bod yn cynnig 65 ceiniog iddo am ddau litr o laeth am eu bod yn gallu cael pris gwell gan gwmnïau eraill.

Fel y cyswllt yn y gadwyn laeth, mae Mr Gibby yn talu 50 ceiniog i'w ffermwyr am y llaeth ac mae potel yn costio deg ceiniog iddo.

Mae hyn yn ei adael â phum ceiniog o elw sy'n mynd i dalu am ei weithwyr ac i brynu tanwydd ar gyfer ei faniau, meddai.

'Sefyllfa druenus'

Rydym ni'n cael llaeth o ddwy fferm ac yn cyflogi chwech o staff felly dwi'n teimlo'n euog am eu gadael i lawr
Rob Gibby, cwmni llaeth Bethesda

Bydd y cwmni yn rhoi'r gorau iddi ar ddydd Gŵyl Dewi.

Mae'n sefyllfa druenus, yn ôl Steven James, Is lywydd NFU Cymru.

"Mae'n newyddion gwael iawn i'r rhan yma o'r byd," meddai Mr James.

"Mae [Rob] yn cystadlu gyda phobl lawer iawn mwy o faint. Mae'r rhan fwyaf o laeth Cymru yn mynd i gwmnïau yn Lloegr, sy'n potelu llaeth, ac mae'n gorfod cystadlu â phobl fel nhw.

"Maen nhw'n dosbarthu drwy ganolfannau sy'n dod â'r llaeth yn ôl i'r rhan hon o'r byd.

"Yn y tri i bedwar mis diwethaf rydym ni wedi gweld archfarchnadoedd yn rhoi disgownt mawr," meddai.

Dywedodd fod rhoi'r gorau i'r cwmni wedi bod yn benderfyniad anodd: "Rydym ni'n cael llaeth o ddwy fferm ac yn cyflogi chwech o staff felly dwi'n teimlo'n euog am eu gadael i lawr," ychwanegodd.



HEFYD
Llaethdy am ehangu a chyflogi mwy
11 Hyd 10 |  Newyddion
Trafod cynlluniau am barlwr godro mawr
26 Awst 10 |  Newyddion
Iawndal i gynhyrchwyr llaeth
04 Chwef 10 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific