Cadarnhau helpu cyllido campws

Roedd cwmni BP wedi dweud eu bod yn bryderus am 'oedi' Llywodraeth y Cynulliad

Mae cwmni BP wedi croesawu cadarnhad Llywodraeth y Cynulliad y byddan nhw'n helpu cyllido campws gwyddoniaeth ac arloesedd gwerth £400 miliwn.

Roedd y cwmni wedi dweud eu bod yn poeni oherwydd "oedi" Llywodraeth y Cynulliad wrth lenwi bwlch cyllido o £15 miliwn ar gyfer cynllun Prifysgol Abertawe.

Ar un adeg roedd y cwmni, sy wedi cynnig tir a chyllid ar gyfer y campws allai greu miloedd o swyddi, wedi awgrymu bod y cynllun "mewn perygl difrifol".

Ond mae'r Dirprwy Brif Weinidog, Ieuan Wyn Jones, wedi cadarnhau fod swm o £15 miliwn wedi ei gytuno mewn egwyddor.

Yn ôl y brifysgol, hwn yw'r prosiect mwya' o'i fath ym Mhrydain ac un o'r rhai mwya' yn Ewrop.

Dywedodd llefarydd ar ran y cwmni: "Rydym ni'n croesawu'r datblygiad sylweddol yma ac yn edrych ymlaen i weithio gyda Llywodraeth Cynulliad Cymru a Phrifysgol Abertawe wrth i'r prosiect cyffrous hwn fynd ymlaen i'r cam nesaf."

Masnachol

Y nod yw y bydd Campws Gwyddoniaeth ac Arloesi'r Bae ar Ffordd Fabian yn rhoi cyfle i ymchwilwyr academaidd gydweithio â chwmnïau er mwyn datblygu syniadau o fudd i'r economi.

Byddai'r ganolfan ymchwil a thechnoleg yn caniatáu i'r brifysgol gydweithio â chwmnïau fel Rolls-Royce.

Mae disgwyl y byddai'n cyfrannu mwy na £3 biliwn i economi'r rhanbarth dros gyfnod o 10 mlynedd.

Dywedodd Ieuan Wyn Jones: "Rydw i'n falch o ddweud ein bod yn cefnogi cynlluniau ar gyfer ail gampws a'n bod yn y broses o gwblhau'r trefniadau gyda'n partneriaid i fynd ymlaen â cham cyntaf y prosiect.

Rydyn ni wrth ein boddau fod y Dirprwy Brif Weinidog wedi gallu gwneud cyhoeddiad cyhoeddus ar yr adeg hon ... Yr Athro Iwan Davies, Prifysgol Abertawe

"Bydd ein cyllid cyfalaf ar gyfer adeiladu'r prosiect, wrth gwrs, yn ddibynnol ar y brifysgol yn dangos ei allu i gyllido gweithrediad parhaus y prosiect.

"Mae manylion pellach y prosiect yn cael eu trafod gyda'n partneriaid ac rydym ni'n cadarnhau manylion yr achos busnes a'r manylion cytundebol gyda'n partneriaid."

'Adfywio'r economi'

Dywedodd yr Athro Iwan Davies Dirprwy Is-Ganghellor Prifysgol Abertawe a chyfarwyddwr prosiect y campws: "Rydyn ni wrth ein boddau fod y Dirprwy Brif Weinidog wedi gallu gwneud cyhoeddiad cyhoeddus ar yr adeg hwn.

"Mae'r Dirprwy Brif Weinidog wedi bod yn gefnogol drwy gydol y broses ac rydyn ni wedi cael cysylltiad parhaus a thrafodaethau manwl gyda'r swyddogion yn ogystal â'n partneriaid.

Rydym ni'n croesawu'r datblygiad sylweddol ac yn edrych ymlaen i weithio gyda Llywodraeth Cynulliad Cymru a Phrifysgol Abertawe ... Llefarydd ar ran cwmni BP

"Gyda'r cyhoeddiad hwn gallwn gynyddu ymdrechion i gyflwyno un o'r prosiectau economi gwybodaeth mwyaf yn Rhaglen Adfywio'r Economi."

Fe fydd y campws ar faes bron 70 erw, ryw ddwy filltir a hanner o ganol Abertawe yn ymyl Ffordd Fabian.

Ac fe fydd lle i 4,000 o fyfyrwyr fyw ar y campws.