Ystyried ailagor lein Amlwch

Dyw lein Amlwch heb gael ei defnyddio gan deithwyr ers 1964.

Fe fydd astudiaeth dichonolrwydd yn ystyried ailagor lein rheilffordd sydd wedi ei chau'n llwyr ers ugain mlynedd.

Bydd cwmni Network Rail yn dechrau rhan gynta'r astudiaeth am ran o lein Amlwch rhwng Llangefni a Gaerwen yr wythnos nesa.

Does dim teithwyr wedi defnyddio'r lein ers 1964, ond bu'n cael ei defnyddio ar gyfer cludo nwyddau tan y 90au cynnar.

Bydd Network Rail yn gweithio gyda Llywodraeth y Cynulliad a Chyngor Sir Ynys Môn ar y cynllun.

'Talcen caled'

Fe fydd rhaid tynnu llystyfiant o'r lein er mwyn i ecolegwyr astudio'r amgylchedd naturiol ar hyd y lein er mwyn adnabod planhigion prin y bydd rhaid eu gwarchod os fydd y lein yn ailagor.

Bydd peirianwyr hefyd yn edrych ar 31 o bontydd a cheuffosydd a 4.5 milltir o drac ynghyd ag ystyried adnewyddu adeilad gorsaf Llangefni.

Dywedodd Mike Gallop o Network Rail: "Dyw lein Amlwch heb gael ei defnyddio ers dau ddegawd ac fe fydd ei adfer ar gyfer defnydd teithwyr yn dalcen caled.

"Heddiw yw'r cam cyntaf tuag at hynny, a gyda Llywodraeth y Cynulliad a'r cyngor sir fe fyddwn yn ystyried y posibilrwydd o wneud hynny.

"Er mwyn i drenau teithwyr fedru defnyddio'r lein unwaith eto, fe fydd rhaid moderneiddio'r system signalau, trwsio ac ailosod trac, pontydd a cheuffosydd, ac fe fydd yr astudiaeth yma yn hanfodol i ni fedru ystyried ateb cost -effeithlon i'r mater."

Cafodd yr astudiaeth, fydd yn ymchwilio i achos busnes dros ail-gyflwyno gwasanaethau i deithwyr rhwng Llangefni a Bangor, ei gomisiynu gan Lywodraeth y Cynulliad.