British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Llun, 10 Ionawr 2011, 11:05 GMT
Cefnogi llwybr arfordir newydd yn Nhywyn

Afon Dysynni
Y gobaith yw y bydd mwy o ymwelwyr yn cael eu denu i'r ardal drwy'r flwyddyn

Mae 'na gefnogaeth yn ardal Tywyn Meirionnydd ar gyfer cynllun i greu llwybr newydd ar hyd yr arfordir.

Ond mae'n debyg bod 'na un tirfeddiannwr sy'n gwrthwynebu.

Fe fyddai'r llwybr yn ddolen allweddol yn Llwybr Arfordir Cymru Gyfan ac yn golygu codi pont newydd i groesi Afon Dysynni.

Os na fydd modd cael cytundeb efo tirfeddianwyr lleol, mae'n bosib y gallai Cyngor Gwynedd fynd i gyfraith er mwyn sefydlu llwybr cyhoeddus newydd.

Ar hyn o bryd mae'n amhosib i gerddwyr neu feicwyr ddilyn llwybr yr arfordir i'r gogledd o Dywyn.

Mae'n rhaid iddyn nhw newid cyfeiriad am tua wyth milltir.

Blaenoriaeth

Er bod 'na le i gredu bod un tirfeddiannwr yn gwrthwynebu creu'r llwybr newydd, dywed Ann Lloyd Jones, sy'n cynrychioli Tywyn ar Gyngor Gwynedd, bod 'na gefnogaeth fawr yn lleol i'r cynllun.

"Rydan ni wedi bod yn trio ers 10 mlynedd i gael pont dros Afon Dysynni.

"Fe wnaethon ni sefydlu partneriaeth a dosbarthu holiadur.

"Un o'r blaenoriaethau oedd cael y bont newydd yma."

Dywedodd bod 'na hen bont yn arfer bod yno pan oedd yn cysylltu gyda gwersyll milwrol ond bod y bont wedi diflannu pan adawodd y milwyr.

"Mae'n bwysig bod 'na bont newydd yma er mwyn denu cerddwyr, beicwyr a'r rhai sy'n marchogaeth.

"Fe fydd yn bwysig iawn i'r economi leol."

Mae'n dawel iawn ar y traeth yn Nhywyn yn ystod y gaeaf.

Ond y gobaith yw y bydd pobl fusnes lleol yn elwa o greu'r llwybr newydd wrth i ymwelwyr heidio i'r ardal drwy'r flwyddyn.

"Mae'n bwysig a dweud y gwir," meddai John James sy'n cadw Caffi'r Cambrian yn y dref.

Argymhelliad

"Fe fydd cael cynlluniau llwybr cyhoeddus yn tynnu nifer o bobl i Dywyn ond fe fydd yn talu ffordd gan fod nifer y cwsmeriaid yn isel ar hyn o bryd.

"Mae'n anodd cynnal busnes yma, yn yr haf mae nifer fawr o bobl yma ond yn y gaeaf... hwn yw'r gwendid.

"Rydan ni'n ffodus yn cael cwsmeriaid lleol bob penwythnos ond ddim cymaint â ddaw yma yn yr haf ac fe fyddai'r cynlluniau newydd yn denu ymwelwyr yma drwy'r flwyddyn."

Fe fydd cynghorwyr yn trafod argymhelliad ddydd Llun i roi caniatâd i swyddogion y cyngor i baratoi gorchymyn i greu llwybr newydd os ydi pob ymdrech i gael cytundeb gwirfoddol efo tirfeddiannwyr yn methu.

Ond os bydd na wrthwynebiadau mawr mae'n bosib y bydd y mater yn cael ei yrru ymlaen at Lywodraeth y Cynulliad am benderfyniad terfynol ar y mater.



CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific