Teyrnged i ferch 15 oed fu farw

Fe gafodd cwest ei agor a'i ohirio

Mae cwest wedi cael ei agor a'i ohirio ar ôl i ferch 15 oed farw'n sydyn dros y penwythnos.

Bu farw Ffion Haf Vaughan-Williams yn ei chartre' ddydd Sadwrn.

Roedd hi'n ddisgybl yn Ysgol Eifionydd ym Mhorthmadog, Gwynedd.

Dyw Dirprwy Grwner Gogledd Orllewin Cymru, Nicola Jones, ddim wedi rhyddhau unrhyw fanylion ychwanegol ynglyn â marwolaeth y ferch.

Dywedodd Heddlu Gogledd Cymru nad oedden nhw'n ymchwilio i'r farwolaeth.

Yn ôl Pennaeth Ysgol Eifionydd, Alwen Watkin: "Rydym ni wedi cael sioc ac yn drist iawn o glywed am farwolaeth Ffion Vaughan-Williams, disgybl ym Mlwyddyn 11 yn Ysgol Eifionydd.

"Roedd hi'n ddisgybl annwyl a dymunol ac mae ei hathrawon wedi dweud ei bod hi'n ferch siriol a bywiog oedd bob amser yn frwdfrydig ac yn gweithio'n galed.

"Mae ei marwolaeth yn drasiedi i bawb oedd yn ei hadnabod ac rydan ni'n cydymdeimlo'n arw gyda'i theulu."