British Broadcasting Corporation

Safleoedd Eraill BBC

Newyddion Mewn Ieithoedd Erail

Diweddarwyd: Dydd Mawrth, 7 Rhagfyr 2010, 06:58 GMT
Cynlluniau i uno rhai o ysgolion Powys

Dosbarth o blant
Gallai swyddi athrawon fod o dan fygythiad

Fe allai cynlluniau i ad-drefnu addysg uwchradd ym Mhowys fod gam yn nes ar ôl i swyddogion addysg argymell y dylai cynghorwyr gefnogi'r cynlluniau.

Mae'r cynlluniau yn cynnwys uno ysgolion, a'r posibilrwydd y bydd rhai ysgolion yn colli eu chweched dosbarth.

Bydd cyfnod ymgynghori o dri mis yn dechrau ym mis Ionawr pe bai Bwrdd Rheoli Powys yn pleidleisio o blaid y cynllun ddydd Mawrth.

Ond mae yna wrthwynebiad chwyrn gan undebau athrawon, sy'n poeni y bydd yna nifer mawr o ddiswyddiadau.

Yr wythnos diwethaf dywedodd y cyngor y byddai'r 13 o ysgolion uwchradd yn parhau ar agor.

Roedd pryder ymhlith rhai y gallai hyd at chwech o ysgolion gau.

Nifer disgyblion yn gostwng

Nawr mae swyddogion addysg yn argymell cadw 13 o safleoedd, ond uno rhai ysgolion.

Byddai hyn yn gadael saith neu wyth o ysgolion uwchradd.

Dywed y cyngor fod angen y newidiadau oherwydd bod nifer y disgyblion yn gostwng.

Mae hefyd angen gwario yn sylweddol ar wella adeiladau.

Fe allai'r cynlluniau weld un pennaeth ar gyfer tair ysgol.

Yr wythnos diwethaf dywedodd llefarydd ar ran y cyngor y byddai swyddi yn mynd o ganlyniad i ddiswyddiadau gwirfoddol neu ymddeoliad cynnar.

Mae yna gynigion hefyd i gau chweched dosbarth, a sefydlu canolfanau chweched ar y cyd gyda Choleg Powys.

Bydd Bwrdd rheoli'r cyngor yn penderfynu ddydd Mawrth a ddylid gwneud cais am £220 miliwn o gronfa Llywodraeth y Cynulliad.

Byddai'n rhan o gynllun 15 mlynedd sy'n werth £314 miliwn ar gyfer addysg uwchradd ac addysg gynradd.

Byddai'r sir yn gyfrifol am gyfrannu £94 miliwn.



HEFYD
Addysg: Pryder undeb am swyddi
02 Rhag 10 |  Newyddion
Mesur y galw am addysg Gymraeg
30 Tach 10 |  Newyddion

CYSYLLTIADAU RHYNGRWYD:
Dyw'r BBC ddim yn gyfrifol am gynnwys safleoedd rhyngrwyd allanol


Archwilio'r BBC

Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr persennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
Americas Africa Europe Middle East South Asia Asia Pacific