£350,000 i wella triniaeth strôc

Meddyg yn derbyn gwybodaeth drwy gyfrwng tele-feddygaeth

Mae Llywodraeth y Cynulliad yn buddsoddi mewn offer arbennig i wella mynediad at driniaeth arbenigol i gleifion sy'n diodde' strôc ar draws Cymru.

Cyhoeddodd y Gweinidog Iechyd Edwina Hart y bydd £350,000 yn talu am offer tele-feddygaeth fel y gall meddygon wneud diagnosis o strôc ble bynnag y mae'r claf yng Nghymru.

Bydd hyn yn eu galluogi i roi triniaeth 'thrombolysis' i'r claf yn syth ar ôl gweld canlyniadau archwiliad CT o'r claf.

Thrombolysis yw'r dull o chwalu ceuladau gwaed trwy ddefnyddio cyffuriau arbennig.

YR OFFER YNG NGHYMRU 2 yn ardal Bwrdd Iechyd Abertawe Bro Morgannwg 2 yn ardal Bwrdd Iechyd Aneurin Bevan 3 yn ardal Bwrdd Iechyd Betsi Cadwaladr 1 yn ardal Bwrdd Iechyd Caerdydd a'r Fro 2 yn ardal Bwrdd Iechyd Cwm Taf 3 yn ardal Bwrdd Iechyd Hywel Dda

Gall hyn leihau cymhlethdodau hir dymor i'r claf.

Ond mae'n rhaid derbyn y driniaeth o fewn cyfnod o dair awr.

Fe fydd yr offer newydd o gymorth i ymgynghorwyr gan nad yw pob claf sy'n diodde' strôc yn mynd i gael budd o driniaeth thrombolysis.

Bydd y dechnoleg yn cael ei chyflwyno'r raddol ar draws Cymru, gyda phob ardal yn cael eu cysylltu i rota o ymgynghorwyr ar gyfer diagnosis a thriniaeth.

'Gwella'n gynt'

Dywedodd Mrs Hart: "Gall strôc gael effaith ddinistriol ar unigolion a'u teuluoedd, ond fe fydd y buddsoddiad hwn yn lleihau'r angen i gleifion deithio i dderbyn y driniaeth orau.

"Trwy gyflymu mynediad i'r cyffuriau sy'n chwalu ceuladau ymhob rhan o Gymru, gallwn leihau sgil effeithiau strôc, gan alluogi cleifion i wella'n gynt a gwella'u safon bywyd."

Dr Anne Freeman sy'n arwain gwasanaeth strôc Llywodraeth y Cynulliad. Dywedodd:

"Bydd hyn yn cefnogi asesiad clinigol cleifion, gan gynnwys darparu thrombolysis ac elfennau eraill o ofal strôc mewn argyfwng.

"Bydd hefyd yn sicrhau fod ardaloedd gwledig Cymru yn elwa, gan alluogi Datblygiad Strôc Cymru i gymryd cam arall tuag at fod yn wasanaethau o safon fyd-eang."