Codi dros £1m ar ddiwrnod Plant Mewn Angen

Mae dros £1 miliwn wedi ei gasglu yng Nghymru

Mae pennaeth Plant Mewn Angen yng Nghymru, Marc Phillips, yn diolch i bobl Cymru am fod mor hael ar ôl i'r cyfanswm yma gyrraedd £1,034, 336 dros nos.

Mae dros £18 miliwn wedi ei godi ledled y Deyrnas Unedig hyd yn hyn.

Dywedodd Mr Phillips: "Dyma'r ail gyfanswm uchaf erioed yng Nghymru ac yn brawf o haelioni pobl Cymru sydd yn cydnabod bod heriau'r cyfnod economaidd anodd hwn yn gallu effeithio'n waeth nag erioed ar blant a phobl ifanc bregus gan greu galw cynyddol am gymorth.

"Diolch o galon i bawb sydd wedi gwneud y canlyniad hwn yn bosibl".

Fe wnaeth grŵp merched The Saturdays ymuno â Pudsey a miloedd o gefnogwyr rygbi i ddathlu noson Plant mewn Angen yn Stadiwm y Mileniwm.

Roedd côr meibion Only Men Aloud hefyd yno i ddiddanu'r dorf yn ystod hanner amser y gêm rygbi rhwng Cymru a Fiji.

Difreintiedig

Cafodd eu perfformiadau eu dangos fel rhan o sioe apêl fyw Plant Mewn Angen y BBC gydag amryw o ddiddanwyr yn gwneud eu rhan i godi arian ar gyfer plant a phobl ifanc difreintiedig ar hyd a lled y DU.

Cafodd y sioe saith awr, a gyflwynwyd gan Syr Terry Wogan a Tess Daly, ei darlledu yn fyw o Ganolfan Ddarlledu'r BBC.

Roedd cyfle hefyd i gael cipolwg ar raglen Nadolig Doctor Who, a gafodd ei gwneud yng Nghymru.

Cafodd y cyngerdd hanner amser yn y Stadiwm ei gyflwyno gan Alex Jones o'r rhaglen The One Show, a'i darlledu i ystafelloedd byw ledled y DU fel rhan o'r sioe apêl.

Cafodd y rhaglen ei darlledu ar BBC Un Cymru.

Dyma oedd y 31ain tro i'r rhaglen gael ei darlledu.

Mae Syr Terry Wogan wedi cyflwyno pob un o'r nosweithiau ar y teledu ers 1980 gyda Pudsey, mascot yr apêl, yn ymuno gyda'r gweithgareddau yn 1985.

Er mwyn cyfrannu gallwch ffonio 0345 7 33 22 33 i gyfrannu, neu ewch i'r wefan bbc.co.uk/cymru/pudsey